Oqalliffik: Nunatsinni sulisinnaasut Danmarkimut qimarrapput
Nunatsinnit Danmarkimut inuit nuuttut, siorna 2012-imi 3.000-it missaanniipput. Inuusuttut Danmarkimi ilinniagaqareernermi kingorna Nunatsinnut uteqqinneq ajortut aamma amerliartorlutik.
Ajornartorsiutit tamakku qaangerneqassappata, Nunarput suliffissanik pitsaasumillu aningaasarsiutaasinnaasunik pilersitsisariaqartoq, Aningaasaqarnermut Siunnersuisoqatigiit siulittaasuata, Torben M. Andersenip oqaatigaa.
- Kalaallit Nunaata aningaasaqarnerata siuariartornera unissaaq, aningaasarsiutissanik aallartitsisoqanngippat Oqartussat aningaasalersorneqarnerat ajorseriassaaq, tamannalu ilutigalugu Kalaallit Nunaanniit aallararneq annertusiartussaaq.
Aningaasaqarnermut Siunnersuisooqatigiit siulittaasuat, Torben M. Andersen taama siulittuivoq.
Danmarkimut inuit nuuttut ataatsimut isigalugit ilinniagartuujupput. Ajornartorsiulli tamannaannaanngilaq, inuussuttut Danmarkimi ilinniagaqartut naammassereernerup kingorna, taakku amerlanersaat Nunatsinnut uterneq ajorput. Tamassumunnga pissutaanerullutik Danmarkimi periarfissat pitsaaneruneri, soorlu suliffissat eqqarsaatigalugit, inuit atugarisaasa pitsaaneruneri soorlu meeqqeriviit atuarfiillu eqqarsaatigiinnarlugit.
Nunatsinnit Danmarkimut nuttarnerup kingunerisinnaasaat aamma qanoq tamassuma qanoq aaqqeriarneqarnissaa pillugit, Aningaasaqarnermut Naalakkersuisoq, Vittus Qujaukitsoq aamma Inuit Ataqatigiit Inatsisartunut ilaasortaatitaa, Sara Olsvig KNR Oqalliffimmi Apollo Jeremiassenimit oqallitsinneqassapput, nalunaaqutaq qulinut.
