Oqalliffik: Inatsisitigut ataataqanngitsut ataataminnik ujarlersinnaanngorput

Inatsisitigut ataataqanngitsut pillugit inatsisissaq Folketingimi isumaqatigiissutaalluni sisamanngormat akuersissutigineqarpoq. Taamaalilluni eqqartuussiviliartoqarsinnaanngorpoq, kinalu ataataginerlugu uppernarsarlugu. Eqqartuussiviulli aalajangernerata alliartornermi ikilerneqaatit ataataqannginnerup pilersitai aaqqinnavianngilai. Ineriartornermi amerlaqisut oqallisigeqqusaanngitsut qinngasaarneqartarnerillu aqqusaartarsimavaat.

Taamaattumik Kalaallit Nunaat pillugu ataatsimiisitaliap isumaqatigiittup kaammattuutigaa qallunaat naalakkersuisuisa Naalakkersuisullu sulissutigissagaat paasiniarlugu inuttut suut pilliutaasimanersut.
Kaammattuullu taanna isumaginninnermut ministerip Radikalineersup, Manu Sareenip, suliassatut tigulluarpaa:

- Tamanna isumaqatigilluinnarpara, inuttullu sunniutigisimasai arajutsinaveersaaqqissaarlugit. Aammattaaq inatsisitigut ataataqanngitsut ilaasa misigissutsitigut apeqqutit suliarinissaannik pisariaqartitsinerat amerlanerit paasisinnaassavaat. Soorunalumi Kalaallit Nunaanni Naalakkersuisut peqatigalugit inatsisitigut ataataqanngitsut taama pisariaqartitsisut periarfissikkusullugit. Manu Sareen oqarpoq.

Inatsisitigut ataataqanngitsut pillugit apeqqut KNR-imi Oqalliffimmi aamma sammineqassaaq. Tanna ullaatungaa nalunaaqutaq qulinut kalaallisut, aqqarnullu qeqqanut qallunaatut aallakaatinneqassaaq.

Oqalliffik KNR-TV-kkut unnugu aamma aallakaatinneqassaaq, kalaallisut arfineq-pingasut qiteqquppat, qallunaatullu qulingiluanut qiteqquppat.