Oqaatsuni illuliat suli inuttaqanngillat

Tassalu illut inoqanngittuarsinnarput, naak INI A/S-ip Oqaatsormiut decembarip 24-ani juullimi tunissutisiasaannik kingusinaartumik imatut neriorsuuteqarfigereeraluarai:

- Isumaqarpunga illut januaarip 15-ani februaarilluunniit aallaqqaataani iserterfigineqarsinnaassasut, INI A/S-ip nunap immikkortuani pisortaa Allan Werge Radioavisimut taamani oqarpoq.

Kisianni ullumi januaarip 31-ani illut suli attartortussaannik malunnartoqanngitsoq, Oqaatsuni Nunaqarfimmi Aqutsisuni ilaasortaq Lars Fleischer oqarpoq.

Naak utaqqinerup sivisuup qinnuteqartut arlallit tunuaannartissimagaluarai, attortorusuttunik suli allatsissimasoqaraluarpoq.

Lars Fleischerilli pisortanut tatiginninnera nunguissimavoq.

- Ukiut marluk utaqqereerpugut, taamani radiokkoortitsigassi neriuleraluarpugut, kisianni taamannangaasiit ingerlaannarput, naluakkaluunniit sunersut, Lars Fleischer taama oqarpoq.

Radioaviisimiit suliaq taanna decembarimi qarajalerneqalermalli pisuuterqattaannerit imaaginnavipput. Panbo, sanasut Qaasuitsup kommunialu akisussaaffimmik imminnut milluupput, minnerunngitsumillu Qaasuitsup Kommuniani politikerit atorfillillu imminnut pisuuteqattaallutik.

Kisiani nukimmik taama atuineq, Qaasuitsup Kommuniani saanaartornermik pisortap Hans Enoksenip "illutipalaavinik" taasaanut nutsernermik kinguneqanngilaq.