Oqaatsivut piginnaanertut isigineqalertariaqarput
– Kalaallisulli oqaatsit piginnaanertut isigineqalertariaqarput, Hans Enoksen erseqqissaavoq.
- Oqaatsivut pisortatigoortumik oqaasiulerpata, innuttaasut amerlanerpaat oqaatsitik atorlugit sullinneqartussaapput. Kisianni tamanna ullormiit ullormut anguneqarsinnaanngilaq. Sulisorparujussuit avataaninngaanneersut pigaavut, taakkulu ilinniartitaanikkut pitsaasumik periarfissinnissaat aqqutissiuukkusupparput.
- Pikkorissaanerit allallu sakkortusarneqartariaqarput. Taamaalilluni kalaallisut oqalunnerulernissamik politikikkut kissaatigisaq pitsanngorsarniassagatsigu, Hans Enoksen oqarpoq.
Hans Enoksen aperineqarami kalaallisut oqalussinnaasut kisimik atorfinitsinneqartalissanersut oqarpoq, pikkorissuseq aamma ilinniarsimassuseq pingaartikkitsik.
- Aamma kalaallisut oqalussinnaaneq piginnaaneruvoq tulluusimaarutissaq. Kisianni qallunaatuinnaq allamiutullu oqaasillit ukiorpassuarni maaniittussaapput aamma mattussinnaanngilavut, Hans Enoksen naggasiivoq.
