Oqaatsitigut Tuluit Nunaannut anneruniarfiginninnini Iranip ingerlappaa
Iranip Tuluit Nunaannut oqaatsitigut anneruniarfiginninnini ingerlappaa.
Iranimiut tv-qarfiat naalagaaffimmit ingerlanneqartoq naapertorlugu, maanna tuluit sakkutuut umiartortut 15-usut nassuerutigisimavaat iranimiut imartaanut sapaatip akunnerani kingullermi iserfigeqqusaanngitsumut isersimallutik:
TV-kkut nutaarsiassaqartitsivik alAlam nunanut araberisut oqaluttunut tamanut aallakaatitsisarpoq. Taamaalilluni Iranip Tuluit Nunaatalu aaqqiagiinnginnerat nunat tamalaat akornanni ilisimaneqalerpoq.
TV-qarfiup paasissutissat sumit pisimanerlugit oqaatiginngilaa. Kisianni iranimiut sakkutuuisa naalagaat arfininngormat oqarpoq; tigusarineqartut angallatimik Iranip imartaanut pisimanera nassuerutigisimagaat. Iranimiut tv-qarfiata siusinnerusukkut tuluit sakkutuut umiartortut 15-usut ilaat sisamat takutereerpaat. Kingusinnerpaamik sakkutuut immap assingani ippassaq takutippaat suatungaaniitillu ullut qulingiluat matuma siornatigut iranimiut sakkutuuinit tigusarineqarsimallutik.
Tuluit sakkutuumik Iranimi tv-kkut takutinneqarnerat assuarliutigereerpaat. Oqaatigalugulu sorsuutaat nunat Irakip imartaani Naalagaaffiit Peqatigiinnit akuerisaasumiissimanerarlugu. Iranimiut tuluit naalakkersuisuinit utoqqatserfigineqarnissartik piumasarisimavaat. Iranimiullu ilinniarnertuut tuluit aallartitaqarfiat sapaatip akunneratalu naanerani ujaqqanik milloorpaat tuluillu aallartitaata Iranimit anisitaanissaa piumasaralugu.
Tuluit Nunaanniit illuatungaani piumasarineqarpoq, tuluit sakkutuui umiartortut iperagaatinneqartariaqartut.
Tuluit naalakkersuisuisa naalagaaffiit oqaloqatigiinnerisigut aaqqiisoqarnissaa anguniarpaat. Aamma sakkutuut umiartortut aniguisitaannissaannut piumasaqarnerminni Tuluit naalakkersuisui Naalagaaffiit Peqatigiinnit, USA-mit EU-millu taperserneqareerput. Taamaattorli Iranimut pillaatitut iliuuseqarnissaq naatsorsuutigineqanngilaq.
