Oqaatsitigut inerisaanermi nunarput Danmarkimiit siuarsimaneruvoq

Meeqqat marlunniit arfinilinnik ukiullit oqaatsitigut ineriartortinneqarnissaat Danmarkimi aatsaat oqallisiginiarsarileraat nunatsinni ukiuni marlunni tamanna ingerlareerpoq.

Danmarkimi meeqqat atuarsinnaanerisa pitsanngorsarneqarnissaat ilinniartitaanermut ministerip misissuiffigilersaaraa pingasunngormat ilanngutassiaraarput. Nunatsinnili tamanna sulissutigalugu aallartinneqareersoq, Inerisaaviup pisortaata Jens Jakobsenip oqaatigaa. Taakku Inerisaavimmiit ilinniartitsisunik pikkorissaasussanik arfinilinnik peqateqarlutik siorna Norgemi paasisassarsioreerput, tamatumalu kingorna nunatsinni perorsaasunik ilinniartitsisunillu pikkorissaallutik.

Jens Jakobsen aperaarput, sooq taama piaartigisumik meeqqat oqaatitigut ineriartortinneqarnissaat pisariaqarnersoq.

- Pisariaqarpoq piaartumik meeqqat oqaatsitigut ineriartortinnissaannut tunngatillugu meeqqanik suliaqartut perorsaasut angajoqqaajusullu ikiorserneqarsinnaanissaat, Jens Jakobsen oqarpoq.

Nangipporlu:

- Minnerunngitsumillu meeqqerisut oqaatitigut ineriartortitsinerup piaartumik nalunaarsorneqarneranik sakkussaqarsinnaanissaat pingaaruteqarpoq. Taamaalilluni piaartumik oqaatsitigut ineriartortitsinermi suliniutaasinnaasut aallartinneqarsinnaassammata, taamalu meeqqat atualernissaminnut oqaatsitigut piareersimanerullutik atuarnertik aallartissinnaassavaat, Jens Jakobsen oqarpoq.

Taassuma qularutiginngilaa tamanna aamma atuffarinnerulernermut ikiuutaasinnaasoq.

Jens Jakobsen nassuiaavoq, Norgemiinnerminni suleriaaserineqartut paasisatik ukiuni kingullerni marlunni kalaallinut naleqqussarsimagitik.

Minnernullu ilinniartitsisut 211-t kiisalu meeqqerivinni perorsaasut 213-t ulluni marlunni pikkorissarsimagitik,

taamalu Nuup kommunia suleqatigalugu meeqqat Nuummiittut 50-t missaat misissorneqarsimasut.

Jens Jakobsenip neriuutigaa, taamaaliornikkut meeqqat assigiinngitsutigut oqaatitigut ikiorserneqarsinnaajumaartut.

- Assersuutigalugu aamma naqinnernik ilisarsisinnaanngitsut piaarnerusumik taamaalillutik ikiorserneqarsinnaassapput. Kiisalu meeqqat oqaatsimikkut ineriartornissaminnik ajornartorsiuteqartut sutigut tamatigut piaartumik ikiorserneqarsinnaassallutik, Jens Jakobsen oqarpoq.

Taanna aamma oqarpoq, Danmarkimut sanilliullutik suliamut taamaattumut alloriarnermik ataatsimik siuarsimanerullutik.