Oqaatsitigut aporfiit inuusuttut ineriartornissaannut akornutaasinnaapput
Inuusuttorpassuit ilinnianngitsoortarnerannut oqaatsitigut aporfiit peqqutaaqataasinnaapput, Tom Ostermann Siumut tunuliaqutaralugu qinigassanngortittoq isumaqarpoq. Pisortat oqaatsit pillugit amerlanerusunik suliniuteqarnissaat ujartorpaa.
-Matumani pilersikkumallugit Inuusuttut ingerlariaqqinnissamut nangaanngitsut aammalu inuiaqatigiinnut akisussaaqataanissamut tunuarsimaanngitsut soorlu maannamut misilittagarilereersimasagut pitsaasut annertusisarlugit. “Timi asimi”-tut aammalu soorlu “Tugdlik”-tut ittut annertusarnerisigut aammalu inuttut ineriartornermik suliniutillit tapersersorluarlugit suliniutaat siunnerfilinnik ukiukkuutaarlugit inuusuttatsinnut naleqquttumik, ataqatigiissumik aaqqissugaasumillu inatsisitigut pisortat kommunillu akornanni aporfiusartut naleqqussarlugit Kalaallit Nunatsinnut inooriaatsimut ataqatigiissumik sinaakkusersiuinikkut, Tom Ostermann oqarpoq.
Oqaatsinik ajornartorsiuteqarnerup inuusuttut ilinniartitaanikkut ingerlariaqqinngitsoortarnerannut pissutaaqataakkajuttarnera taamaattumillu pisortanit ikiorsiissutinik pisartagaqartartunngortarneri erseqqissaassutigaa. Ajornartorsiutinullu tamakkununnga aaqqiissuutaasinnaasumik Tom Ostermann isumassarsarsiaqarpoq.
- Ilaatigut “Piareersarfiit” suleriaasiat eqaallisarlugu inuttut ineriartornermut periarfissat pikkorissaasartut kalaallisut oqaasillit atorluarnerisigut aamma tarnip pissusaanik ilisimasalinnik amigaateqarnerujussuarput eqqarsaatigalugu periarfissat tamakkiisumik pigitinnagit nalunngilara inuusuttatta oqaasinnguisinnaaneq periarfissaatillugu iluaqutigisaraat, Tom Ostermann isumaqarpoq.
