Oqaatsit pillugit politikkeqalernissaq piareersimaffigineqanngilaq

Oqaatsit pillugit politikkalernissaq upernaaru inatsisartuni oqaluuserineqartussap piviusunngorsinnaanera oqaasileriffimmi atorfilimmit siusigineqarpoq.
Allattoq Jaaku Lyberth
novembarip 15-at 2009 17:23

Kalaallit oqasii pillugit politikkimik ukioq 2001-imi nalunaarusiortoqarpoq innersuussutitaqartunik, taannali politikerinit malinneqanngilaq atorneqarani aningaasaliiffigineqaranilu, Nuka Møller Namminersorlutik Oqartussat Oqaasileriffianni Akamisk Fuldmægtig oqarpoq. Namminersorneq atuutilermat kalaallit oqasiisa pingaarnertut inissisimalernissaat oqaatigineqarpoq, aqqutissiuussisoqanngilarli kalaallisut oqaatsit pingaarnertut qanoq inissisimassanersut.

Kalaallit oqaasii pillugit politikkeqalernissaq pingaaruteqarpoq kisianni oqallisigilluaqqaartariaqarpoq, Nuka Møller oqarpoq. Oqaatsitta inissisimaffia qulakkeeqqaarlugu iliuuseqartoqassaaq.

Oqaatsit pillugit politikkimik 2001-imi nalunaarusiortoqarpoq innersuussutitaqartumik, mannalu tikillugu oqaatsit pillugit oqallittoqarnerani eqqaaneqarneq ajorpoq, Oqaasileriffimmi atorfilik Nuka Møller oqarpoq. Nalunaarusiaq taanna malinneqarnersoq politikerinit malersorneqarneq ajorpoq, nalunaarusiallu atuutsinneqarnissaanut aningaasaliisoqarneq ajorpoq. Oqaatsit pillugit politikkeqalernissamik oqalunneq oqaasiinnaavoq, aalajangersimasumik malittassamik soqanngimmat. Nuka Møller isumaqarpoq kalaallisut oqaatsigut pillugit politikkeqalernissaq pingaaruteqartoq, aaqqissuusaanerusumillu ingerlanneqarnissaa kissaatigalugu. Namminersorneq eqqunneqarmat oqaatigineqarpoq kalaallit oqaasii pingaarnertut inissisimassasut, taamaattorli qanoq pingaarnertut inissisimanissaat pillugu aqqutiuussisoqarani qanorlu kalallisut oqaatsit pingaarnertut atorneqarnissaata ingerlanneqarnissaat, Nuka Møller oqarpoq.

Inuit Ataqatgiit inuusuttaat Inuusuttut Ataqatigiit oqaatsit pillugit politikki pillugu Kulturip illorsuani Katuami tamanut ammasumik oqallititsipput, innuttaasut 35-it missaannik amerlassuseqartunik peqataaffigineqarluni.