Oqaaseqqaat nunarsuarmi akuleriiffiusumi - taama qulequtserneqarpoq Oqaatsit pillugit katersuutsitsinissaq, Kalaallit Illuutaanni Københavnimiittumi septemberip ulluisa 15-ianni ingerlanneqartussaq.
Oqaatsit pillugit katersuutsitsinissami Kalaallit Illuutaat aaqqissueqataavoq. Oqaatsit pillugit ukioq kingulleq katersuutsitsineq Danmarkimi siullermeerlugu ingerlanneqarpoq. Tassani oqaatsit pillugit peqatigiiffik ”Københavns Esperanto Klub” aaqqissuussisuuvoq.
Oqaatsinit assigiinngitsunit 13-init peqataasussat nalunaareerput, afghanistanimiusut, russisut, persiamiusut, franskisut aamma spaniamiusut oqaluttunit peqataasoqassaaq.
Isiginnaartut alapernaattullu untritillit arlaqarnissaat ilimagineqarpoq. oqaatsit sananeqaataat nunanillu assigiinngitsunit takutitsinerit katersuutsitsinermi takuneqarsinnaassapput.
- Kalaallit oqaasii pillugit pikkorissartitsineqassaaq, takutitsinerit tusarnaartitsinerilluunniit aamma ingerlanneqarnissaat sulissutigaarput, Kalaallit Illuutaanneersoq, Lisbeth Valgreen, oqarpoq.