Oqaatsit pillugit isumaqatigiinneq qaqutigoortoq
Atuakkat ullutsinnut naleqquttut ilinniartitsisullu, kalaallisut oqaatsit allanertat oqaasiisuut ilinniartitsisinnaasut. Kalaallisut oqaasiinik ilinniartitsissutit pitsaanerulertariaqartut, Siumup siulittaasua Aleqa Hammond isumaqarpoq:
- Seminariami ilinniarsimasoq ataaserluunnit oqaasitsinnik allanertat oqaasiisut atuartitsinissamut ilinniarsimangilaq, soorluttaaq pisariaqartitsisunut atuartitsinissamut atortussaqanngitsoq, Aleqa Hammond oqarpoq.
Siunnersuut partiinit tamanit tapersersorneqarpoq. ilinniartitsissutit pitsaanerulersinnissaannut aningaasaliinissaq tamanit pisariaqartutut isigineqarpoq.
Kisiannimi pisariaqartitsineq qanoq angitigaa? Qassiit kalaallisut ilinniarusuppat? Ilinniartitsisut qassit pisariaqartinneqarpat? Tamakkualu tamaasa piviusunngortinniaraani qanoq akeqassappat?
Atassutip oqaaseqartua Knud Kristiansen Inuit Ataqatigiillu oqaqseqartuat Naaja Nathanielsen tamakkuninnga apeqquteqarput:
- Siunnersuutip piviusunngortinnissaanut tigussaanerusunik paasisaqarnissara pisariaqartippara. Tassami atuakkat immini naammanngillat. Atuarneqartussaapput, aammalu aalajangersimasumik periaaseqarluni atuarneqartussaallutik. Tassalu kalaallit oqaasii allanertat oqaasiisut iluatsittumik ilinniartitsisutigineqassappata assigiinngitsorpassuit iluatsittariaqarput, tamakkualu paasisaqarfigisariaqarpagut, Naaja Nathanielsen oqarpoq.
Oqaatsit pillugit oqallinnermut atatillugu Siumut pitsaasumik saqqummertalernerarlugu, Demokraatit Inuit Ataqatigiillu nersuipput. Tamannalu qaqutigoorpoq.
- Oqaatsit oqaatsinillu iliniarneq pillugit oqallinneq ammasumik inussiarnersumik, pissuserissaarlunilu ingerlanneqalermat nuanneqaaq, Naaja Nathanielsen oqarpoq. Taanna nangilluni oqarpoq, Siumut akaarinninngitsumik arlaleriarluni pissusilersortarsimasoq.
- Assersuutigalugu qinikkat Inatsisartut oqaluttarfianniit oqaluttassanngitsut siunnersuuteqarnikuupput. Assersuutigalugulu kalaallit qallunaatuinnaq oqaluttut suarsunnik taajortarlugit, soorlu 1990-ikkunni naasuusaanik taasaraatigut, Naaja Nathanielsen oqarpoq.
Kisianni Aleqa Hammond isumaqarpoq, partiit naalakkersuisuutitaqartut, Siumup oqaatsit pilugit politikiannik maannamut paatsoortarsimasoq:
- Allamiuluanngilagut. Inuiaqatigiinni akuutikkusuppagut. Nersualaarinninnerat takussutissaaginnarpoq, uagut politikitsinnut paasinninnerulersimasut, tassami uagut politikerput allanngortinngilarput, Aleqa Hammond oqarpoq.
Siunnersuut ilinniartitaanermut ataatsimiititaliami suliarineqassaaq.
