Oqaatsit pillugit inatsisissaq iluarineqanngilaq
Oqaatsit pillugit inatsisissatut siunnersuut Inatsisartuni ilaasortat amerlanerussuteqartut ullumi taperserpaat. Siunnersuulli pingajussaaneerlugu oqaluuserineqartinnagu allanngortittariaqartoq, kultureqarnermut ataatsimiititaliaq isumaqarpoq.
Kalaallisut qallunaatullu allagartalersuisarnissaq siunnersuummi piumasarineqanngilaq. Aamma innuttaasut suliffeqarfinnut saaffiginnissutaat oqaatsit sorliit atorlugit akineqartassanersut siunnersuummi piumasarineqarani.
Inatsisissatut siunnersuut akuerineqartinnagu naalakkersuisut allannguutissatut siunnersuutaat inatsisartuni oqaluuserineqaqqaassapput.
Oqaatsit pillugit inatsisissap eqqunneqarnerata malitsiganik pisortat namminersortullu suliffeqarfiutaanni aningaasartuutigineqartussat ersarinnerusumik qulakkeerneqarsimannginnerat kultureqarnermut ataatsimiititaliamit aamma iluarineqanngilaq.
- Aningaasartuutigiumaakkat ersarinnerusumik qulakkeerneqannginnerat akissussaassuseqanngissusermik ersersitsineruvoq, kultureqarnermut ataatsimiititaliaq isumaliuutimini taama allappoq.
