Oqaatsit pillugit Demokraatit akerliliipput
Kalaallisuinnaq oqaluttoqartalernerata kinguneranik inuiaqatigiinni ikinnerussuteqartut, amerlaqisulli - taakkununnga ilaallutik Inatsisartuni ilaasortat sisamat - Inatsisartut oqaluttarfiannut qaqeqqusaajunnaassapput, partiip naalakkersuinikkut oqaaseqartartua Niels Thomsen ilaatigut taama allappoq.
Taanna isumaqarpoq, siunnersuut inuit pisinnaatitaaffiinut akerliusoq aamma inuit kalaallisut oqaaseqanngitsut inuinnaat naalakkersueqataaneranni oqalliseqataasinnaanerannik piiaanerussasoq.
Aamma Siumup illuatungiliuttutut suleqatigisaata Atassutip siunnersuut isumaqatiginngilaa:
- Innuttaaqativut kalaallisut oqaluttuunngitsut qinikkatut inissisimallutik inuiaqatigiinnik kiffartuussisut, soorunami innuttaasunit qinigaagamik, qinikkatulli kalaallit oqaasiinik atuisutut inuiaqatigiinnik sullissinissaminnut killilersorneqaratik sulisinnaatitaasariaqarput, Atassutip siulittaasua Gerhardt Petersen ilaatigut taama allappoq.
Demokraatit naalakkersuinikkut oqaaseqartartuata aamma tupigusuutigaa, SIK-p siulittaasuata Jess G. Berthelsenip Siumup siunnersuutaa tapersersormagu.
Niels Thomsenip SIK-mut ilaasortat taamatut isummernermut tapersersuinissaat qularaa, Jess G. Berthelsenilu kajumissaarlugu kattuffiup politikkianik ingerlatseqqullugu.
Siumup siunnersuutiginiarpaa, Inatsisartut oqaluttarfianniit 2013-imiit kalaallisuinnaq oqaaseqartoqarsinnaalernissaa. Siunnersuut taanna partiip Inatsisartut ataatsimiinneranni upernaaru saqqummiunniarpaa, siunnersuullu Sisimiuni ataasinngormat unnukkut oqallitsitsinissaq sioqqullugu saqqummiunneqarpoq.
Unnummi oqallitsitsinermi peqataasut 220-t sinneqartut, Siumup siulittaasuata oqaatigaa, oqaatsittalu namminersulermi pingaarnerpaanerat qulequtarineqarluni.
