Oqaatsit pillugit ataatsimiilersut
Ukiormanna qulequtarineqassapput ilitsoqqussaralugu oqaaseqarneq, tapertarisamik oqaaseqarneq, nunat eqqaamiorisat oqaasii allamiullu oqaasii. Ataatsimiinnermi assigiinngitsunit saqqummiisoqartassaaq, takornariartoqassalluni aamma katersugaasivimmut pulaartoqassalluni. Oqaasileriffik tusagassiorfinnut taama nalunaaruteqarpoq.
Kultureqarnermut Naalakkersuisoq, Mimi Karlsen, ataatsimiinnermi Namminersulernerup kingorna kalaallit oqaasii pillugit oqalugiassaaq.
Kalaallit peqataasussat saniatigut Sverigemit Islandimiillu oqallissaarisoqassaaq, aamma Nunani Avannarlerni ussersorluni paaseqatigiittarneq ilaatigut oqaluuserineqassallutik.
Oqaasileriffiup pisortaa, Carl Christian Olsen, tikilluaqqusisuussaaq, tusagassiorfinnullu nalunaarummini oqaatigaa, Oqaasiliortut allattaat ataqatigiissaarineq siunertaralugu ukiumoortumik aamma ataatsimiissasut.
