Oqaatsit pillugit ataatsimeersuassapput

Issittumi oqaatsit atorneqartut, inuppassuarnit atugaanngitsut, qanoq tammatsaalineqarsinnaanersut ataatsimeersuarnermi pingaarnertut sammineqassaaq.

Tassami nunat inuiisa oqaasii, nunarsuarmioqataanerup aqqani, sanngiilliartuinnartarmata, tuluit oqaasiisa atugaaleraluttuinnarfiini.

Kalaallit oqaasii, issittumi oqaatsinut allanut sanilliullugit, ajorpallaanngitsumik atugaagaluartut, Alaskami Canadamilu Inuit indianerillu oqaasii sanngiilliartorput, soorluttaaq Skandinaviap Avannaani samet oqaasii aamma sanngiilliartortut.

Taamaattuminguna Canadami Inuit Issittormiut Siunnersuisoqatigiiffiat, Norgimi Samerådet peqatigalugu, Tromsømi ataatsimiinnissamut, oktobarip ulluisa 20-anni 21-annilu ingerlanneqartussamut suliniuteqartuusut.

Duane Schmidt, ICC-Canadameersoq, CBC-Newsimut oqarpoq, taamaaqatimi, inuusuttorpassuillu, oqaatsit ilitsoqqussaralugit oqaatsitik puigoreersimagaat.

- Maannakkut iliuuseqartoqartariaqarpoq, namminerisamik oqaaseqarnerup nukittussusaa annaassanngikkutsigu, Duane Schmidt oqarpoq.