Oqaatsinut taarsiussat paasiuminaallisakkat kiisami paasineqarput

1942-mi sorsunnersuaq kingulleq ingerlaleruttortoq, nalunaarasuarnermi oqaatsinut taarsiussat paasiuminaallisakkat pingasut, qanoq imaqarneranik paasineqarsinnaasimanngitsut, imarisaat qarasaasiaq atorlugu kiisami paasineqartut, BBC allappoq. Paasiuminaallisakkanik taamaattunik paasiniaasartut, pikkorissutut nalilerneqartartut, arlalissuit, allakkiat taamanersuarli paasiniartarsimagaluarpaat, iluatsinngitsumilli.

Paasiuminaallisakkat atorlugit tyskit imminnut attaveqaqatigiittarnerat iligisaasa paasisinnaasarsimanngilaat, taakkuli atorlugit iligisat umiarsuaat tyskit aqqartartuiniit eqqorneqartarsinnaasimapput.

Paasiuminaallisakkat taakku suna tamaat atorlugu paasiniarneqarsimagaluarput, paasiniaasartulli taamaatiinnartariaqarsimapput. Ilaatigut tamanna pissutigalugu, sakkutuut iligisarpassuit imarpissuup Atlantikup avannaani 1942-imi sakkutoorpassuarnik annaasaqarsimapput.

Paasiuminaallisagaq ataaseq tyskit aqqartartuutaata, U264-ip, naalagaanit, Hartvig Looksimit, 1942-imi nassiunneqarsimavoq.

Paasiuminaallisakkami maanna paasineqartumi ilaatigut ima allassimavoq: - Saassussisoqarnera pissutigalugu aqqartariaqarpunga.

Qaartartut immami itisuumi qaarsinnaasut. Akeqqat malippakka.