Oqaatsinut inatsit malinneqanngilaq
Namminersorlutik Oqartussat allaffeqarfissuani sulisut oqaatsinik ilinniartinneqartartut ikiliartuinnarput, Sisimiuni Oqaatsinik Pikkorissarfik taama nalunaaruteqarpoq.
Sulisut kalaallisut ilinniarnissaminnut sulinngiffeqarnissaminnut periarfissaqartinneqanngillat, naak ilinniarusussuseqaraluartut.
Oqaatsinik Pikkorissarfiup Sisimiuniittup oqaatsinik pikkorissartittagai ikiliartuinnarput. Pikkorissartut akornanni taamatittut amerlasoorujussuupput, taakkua sulisitsisuminnit freernissaminnut periarfissinneqartanngimmata, Oqaatsinik Pikkorissarfimmit taamatut nalilerneqarpoq.
- PIkkorissartut oqaloqatigigaangatsigit sulinngiffeqarnissartik ajornakusoortittaraat tusartaannarparput. Sulisitsisut suliniummut tapersersuinngippata taava anguniagaq soorunami angujuminaannerussaqaaq, Johan Meyer, Oqaatsinik Pikkorissarfimmi qullersaasoq taama oqaluttuarpoq.
Namminersorlutik Oqartussani sulisut kalaallisut ilinniarumasut sulinngiffeqarallartinneqartarnissaat tunuarsimaarfigineqarnerpaavoq, naak oqaatsit pillugit inatsit 2010-mi atuutilereeraluartoq. Inatsimmi malillugu sulisut oqaatsinik pikkorissartinneqarusuttut tamarmik neqeroorfigineqartarnissai sulisitsisut taamanili pisussaaffilerneqareeraluarput, Namminersorlutilli Oqartussaneersut oqaatsinik pikkorissariartitat ukiuni kingullerni pingasuni akerlianik ikiliartuinnavissimapput. Johan Meyer taama oqaluttuarpoq.
Oqaatsinik Pikkorissarfimmut pikkorissartariartartut ungasianiillu pikkorissarneqartartut ikiliartuinnavissimapput, maangaannarlu uniinnartartut aamma amerlasuupilussuanngorsimallutik.
2011-imi januaariungaa modul 1-imik taagorneqartumik alaallisut ungasianiit oqaatsinik pikkorissarneqarumasut 44-t qinnuteqarput. Taakkunannga arfineq marluinnaat pikkorissarnertik naammassivaat. Oqaatsinillu Pikkorissarfimmiut naliliinerat malillugu suliffeqarfimmi ulappunnersuaq tamatumunnga pissutaavoq, pikkorissariartullu Kalaallisut ilinniarumassuseqannginneranut attuumassuteqarani.
Namminersorlutilli Oqartussat suliffeqarfiineersunik allanik pikkorissariartoqarpallaarneq ajorpoq. Oqaatsinummi inatsisitaaq malillugu pisortat, namminersortullu suliffeqarfii qulit sinnerlugit sulisullit oqaatsinik pikkorissartitsinissamut neqerooruteqarsinnaasussaagaluarput, Johan Meyerillu pissutsit taakku ima oqaaseqarfigai:
- Naamik, taakku aamma takuneq ajuippavut. Oqaatsinummi inatsit suliarineqarmat namminersorlutik suliffeqarfiit oqaatsinut politikkeqalernissaat naatsorsuutigisimagaluarparput, taamaasiortoqarpammi uagut akulerussinnaaniassagatta. Tamakkuli tamarmik qatagiinnarput. Sisimiuni Oqaatsinik Pikkorissarfimmi qullersaq Johan Meyer taama oqaluttuarpoq.
Sisimiuni Oqaatsinik Pikkorissarfimmi Kalaallisut pikkorissartitsinerit aqqaneq marluk 2011-mi Sisimiuni Nuummilu ingerlanneqarmata pikkorissartut 72-it aallartipput. Pikkorissartitsinerillu arfinillit pikkorissarumallutik qinnuteqartut ikippallaarneri pissutaallutik unitsiinnarneqartariaqarsimapput.