Oqaatsinut ilisimasaqarnermullu misilitsittalissagaluarput
Dansk Folkeparti aalajangiisussaasuugaluarpat, Savalimmiunut Kalaallit Nunaannullu nunasisut danskisut innuttaassuseqarnissaminnik qinnuteqartut, danskisut oqalussinnaanertik, inuiaqatigiinnilu ilisimasaqassusertik misilitsissutigisassagaluarpaat.
Nunanit allanit Danmarkimut nunasisut pillugit malittarisassat nutaat Folketingimi oqallisigineqarmata taamatut nalunaaruteqartoqarpoq.
Dansk Folkepartiip siunnersuuteqarnera Folketingimi partiinit allanit akuerineqassappat, nunasisut tamarmik misilitsittaalissapput.
Assersuutigalugu Frankrigimiu nunatsinni ukiuni arfineq-marlunni najugaqarsimasoq innuttaassuseqarnissaminut qinnuteqarnermi pinngitsoorani danskisut oqalusinnaasariaqassaaq Danmarkimi najugaqarsimanngisaannaraluarluni.
Atlantikup avannaani suleqatigiinni ilaasortaq, Savalimmiuneersoq, Høgni Høydal isumaqarpoq, tamanna inunnik immikkortitsinertut taasariaqartoq Savalimmiunut Kalaallit Nunaannullu nunasisut misilitsinnerminni artorsarnissaat pissutigalugu.
Høgni Høydalip siunnersuut piviusunngortinneqannginniassammat malersoqqinniarpaa.
Malittarisassatut siunnersuutigineqartut Danmarkip naalagaaffiani innuttaasunut qanoq kinguneqarsinnaaneri suli eqqartorneqanngitsoq nunasisunut ministeri, Rikke Hvilshøj oqarpoq.
