Oqaatsinik pikkorissarfik aamma Nuummi
Oqaatsinik ilinniassatilluni, assersuutigalugu kalaallit oqaasiinik pikkorissassatilluni, siornatigut Sisimiunut angalaqqaarnissaq pisariaqartartoq, maanna periarfissaalissaaq Nuummi ilinniarnissaa.
Oqaatsinik pikkorissarfimmik Nuummi pilersitsinissaq siunniunneqarsimavoq, oqaasileriffimmilu pisortaq, Johan Meyer tamanna pillugu ima oqarpoq:
- Maanga Sisimiunukartartut 80 procentii kalaallit oqaasiinik pikkorissariartartut Nuumminngaanniit aggertarput. Ajornartorsiutaasimasoq tassaavoq Nuummi sulisitsisut, sulisuminnut pikkorissarusuttunut ulluni 14-ini sulinngiffeqartitsisarnissamut tunuarsimaartitsisarsimammata, taamaammat ukiuni arlaqalersuni eqqarsaatigisarsimavarput, Nuummi immikkoortortaqarlernissaq. Taamaasippat kalaallit oqaasiinik pikkorissaasarnissaq pitsaanerusoq ingerlasinnaalissammat. Aamma Nuup illoqarfiani kalaallisut oqalunnissaq pisariaqarpallaarneq ajorpoq, taamaammat pikkorissartartut ilikkagaraluatik ingerlaannaq puigoqqittarpaat. Taamaammat aamma pikkorissaasarnerput allannguallalaassavarput, soorlu soraarnerup kingorna naapeqatigiisitsisarluni immaqalu aamma ilinniartitseriaatsimik allaanerusumik ingerlatsisalerluta, Johan Meyer naggasiilluni taama oqarpoq.
Kalaallit oqaasiinik pikkorissartartut pikkorissareernermik kingorna ilikkakkaminnik ingerlatsiinnartarnissaq ajornakusoortittarpaat. Line S Kolding, sisimiuni pedagogitut atorfilik kalaallit oqaasiinik pikkorissarsimasoq, isumaqarpoq, ilikkakkanik aallussiniaannarnissaq ilaannikkut ajornakusoorsinnaasartoq:
- Pikkorissaqataasimasuusugut kissaatigisaqaarput, oqaatsit pillugit paasissutissanik ilinniagassanillu nassittuarneqarnissaq, soorlu SMS-i aqqutigalugu taamaaliortoqartartoq. Taamatullu pikkorissaqataasimalluni taamatut pineqarluni iluaqaaq, tassami kisimiippallaarluni iluaqutaaneq ajorpoq. Aamma kissaatiginarpoq, pikkorissaqataasimasut akornanni naapeqatigiisinneqartarnissaq, Line S Kolding naggasiilluni taama oqarpoq.
Line S. Kolling aamma isumaqarpoq, kalaallit oqaasii atorlugit suleqatitit oqaloqatiginiartarnissaat pisariaqartartoq. Nuummi immikkoortortaqalerneq ukiumut 700.000 kr-nik akeqartassasoq oqaasileriffik oqarpoq, aamma tuluttut oqaatsit Nuummi ilinniartitsisutigineqartalissapput.
