Oqaatsinik ilinniarfik Nanortalimmi immikkoortortaarpoq
Aatsitassarsiornermi tuluttutn oqaatsit qallunaallu oqaasii ilinniartitsissutaasarput. Aammali kalaallisut oqaatsillu allat ilinniartitsissutigineqartassapput Oqaatsinik pikkorissarfik Nanortalimmi immikkoortoqarfeqalerpat.
- Kissaatigaarput kujataani sullitatta pitsaanerpaamik sullinnissaat. Taamaattumik taqqavani immikkoortoqarfiliorpugut. Kommunimi suliffissarsiussisarfik suleqatigilluarparput taakkulu pikkorissaanissanik noqqaajuartuupput. Pikkorissartut aamma ilikkarusussuseqartarput takkuttuartartuullutillu. Pikkorissartut takkutarnerat 90 - 95 procentimiippoq tamannalu ajunngeqaaq, Nanortalimmi oqaatsinik pikkorissarfiup immikkoortuani pisortaq Thor Jonasen oqarpoq.
Oqaatsinik pikkorissarfik ullumi ammaanersiorneqarmat borgmester Simon Simonsen aamma inuussutissarsiornermut suliffissaqartitsiniarnermullu ataatsimiititaliap siulittaasua Kalistat Lund oqaaseqarput, innuttaasullu kaffillerfigineqarput tassanilu pikkorissarnissamut periarfissat nassuiarneqarput.
- Oqaatsinik pikkorissarfik ukiuni kingullerni Kommune Kujallermi iluatsilluartumik pikkorissartitsisarsimavoq taamaalillunilu iluaqutaasumik nunatta immikkoortoqarfianiilereerluni. Taamaattumik iluarisimaaqaarput, maanna pikkorissarfik pisortatigoortumik Nanortalimmi immikkoortoqarfeqalermat, aamma Inuussutissarsiornermut suliffeqarnermullu ataatsimiititaliamit suliassat tikilluaqqukutsoorpagut, Kalistat Lund oqarpoq.
