Oqaatsimik ukiumut pigititassamik ujarlerneq ajorput
"Inuummarissarfik", "Silap pissusia" aaamma "Naalakkersuisut Inatssiartullu".
Tassaapput oqaatsit nunatsinni ukioq manna assigiinngitsutigut nutaatut atorneqalersutut taaneqarsinnaasut.
- Nutaatut saqqummertuni immaqa taasinnaavarput, inuunerissarfik - Europamiut wellnesscenterimik taasagaat, Carl Christian Olsen taama oqarpoq.
Aamma oqariaasitoqqat ilaannik atorneqaleqqittumik malugisaqarpoq:
- Klima, kalaallit 1800-ikkunnili silap pissusaanik taagorpaat. Silap allanngoriartornerinngilaa, silap pissusaata allanngoriartorneraa.
Oqaatsit ukioq mannamut pigititatut taaneqarsinnaasut, Carl Christian Olsenip eqqaasai suli amerlanerugaluarput, soorlumi oqartoq:
- Uagutsinni nutaaliat amerlanermik. Ilaanni allaat oqartarpugut, Danmarkimi immaqa ukiut 20-kkuutaarlugit oqaatsitigut kinguaariit paarlaattartut, Nunatsinni immaqa ukiut tallimakkuutaarlugit taamaapput.
Tassalu Oqaasileriffik suliassarpassuaqarpoq, assersuutigalugulu taaguutit qarasaasiamut tunngasut 3000-init amerlanerit qanittukkut isummerfigissavaat.
Taamaammat oqaatsimik ukiumut pigititassamik ujarlerneq ajorput.