Oqaasileritooq toqukkut qimaguppoq
Ilinniartitsisoq, oqaasileritooq ilinniarfissuarmilu ilinniartitsioq, Lars Møller Lund, Miilu, 85-inik ukioqarluni ippassaq pingasunngornermi januaarip 28-ani unnuakkut eqqissilluni toquvoq.
Allattoq Jens Thorin
januaarip 30-at 2015 09:19
Miilu kulturikkut suliniuteqarsimasunut 2009-imi Namminersorlutik Oqartussanit nersornaaaserneqarpoq.
Miilu ilinniartitsisunngorniarluni Nuummi Ilinniarfissuarmi ilinniareernermini aamma Danmarkimi ilinniarsimavoq.Aamma Københavnip Universitetiani atuarsimavoq, eskimologinnguutigisaminik.
Miilu Oqaatsinut Allataatsimullu Ataatsimiititaliami siulittaasuunermigut allattaasitta 1973-imi atuutilerniissaanut akuulluarsimavoq. Aamma atuakkiortarnermigut oqaluttuaatitoqqatta ilisimaneqarnerulernissaannik ilungersuuteqarsimavoq.
Kiisalu KNR-radiop aallakaatittagaani nuannarineqaqisumi Aperiinnariarimi ukiorpassuani aalajanersimasumik peqataasartuulluni.
Lars Møller Lund Nuummi sapaatiuppat ilisaassaaq.
