Oqaasilerineq Ilimmarfimmi soqutigineqarluarpoq

Ilinnialersut ilinniartitsisullu soqutiginninneq pillugu paasiniaaffigilaarpagut.

- Oqaasilerineq, atuakkialerineq kiisalu tusagassiuutilerineq qangali soqutigisarivakka, Miki Jensen, Saqqami peroriartortoq kingornalu Uummannami najugaqartoq Oqaasilerinermut, atuakkialerinermut kiisalu tusagassiuteqarnermut ilisimatusarfimmi ilinnialernini pillugu taama nassuiaallatsiarpoq, taanna ilinniartullu nutaat katillugit 180-it Ilimmarfiup inersuaani katersuuteqataasoq naapipparput. Aviaq Jørgensen ukiut sisamassaat ilinniartuusoq, kalaallit oqaasiinik sammisaqarnermi nunani allamiut oqaasii aamma atorneqartartut nassuiaavoq.

- Kalaallit oqaasii misissortarpagut sumik tunngaveqarnersut, qanoq oqaaseqatigiimmi immikkoortiterneqarsinnaanersut, oqaatsit isumaat, nagguii, taavalu najoqqutassat, teori, qallunaatut tuluttut ilaatigut aamma svenskisut siunertarisarpagut.

Ilisimatusarfimmi ilinniarnermi nunanut allanut ilinniariarsinnaaneq aamma periarfissaavoq, tamannalu Hanne Sørensenip ukioq kingulleq misilippaa.

- USAp avannaani, New Hampshiremi, Dartmouth Collegemut aallarpunga, tassanilu nammineq piumassutsinnik qinerpakka nunap inoqqaavi sammissallugit. Piviusulersaarusiorpunga, apersuillunga inuusuttunik qulinik 18-iniit 23-it tungaanut ukiulinnik filmiliorlunga, oqaatsitsigut taavalu piorsarsimassutsimut tunngatillugu.

Oqaasilerinermut, Atuakkialerinermut Tusagassiuteqarnermut ilisimatusarfimmi aqutsisoq Jette Rygaard ilinniarfimmut soqutiginninnerup annertusiartornera tunngavissaqarluarsoraa, tupaallaatiginagulu.

- Tusagassiuutit innuttaasunik ataqatigiisitsisuupput, taakkualu inuiaqatigiit pillugit oqaluttuartuupput. Oqaatsit kinaassutsimik pilersitsisarput, tamannalu ilisimatusarfimmi sammisarparput, atuakkialerinerlu oqaluttuarisaanermik qanganitsamik kiisalu nutaajusumik takutitsisarpoq, taakkuninngalu soqutiginninneq paasisinnaalluarpara, Jette Rygaard nassuiaavoq. Taassumap ilinniartut uummaariissuuneri kiisalu soqutiginnittuuneri unnersiuutigai, taakkualu aamma ilinniartut amerlinerinut tunngavissaasorai.

Ilisimatusarfimmi ilinniarfiit nutaat marluk aamma aallartinneqarput,

HD 2-mi ilinniartut 30 aallartipput, tassani aningaasarsiornermik ingerlatsineq kiisalu aaqqissuussaaneq ilinniartitsissutigineqarput. Kiisalu ilinniartitsisut 23 diplomuddannelsemi aallatipput, ilinniartitseriaatsit siunertaannik isumaannillu ilinniassallutik.