Oqaasileriffik oqaatsinik katersilerpoq
Nunatsinni Tele-Post centereqarfiit tamarmik postkortinik agguaassiffigineqassapput, oqaatsinik katersinermut atorneqarsinnaasunik agguaassiffigineqassallutik. Innuttaasut kikkulluunniit taamaasillutik oqaatsinik katersinermut peqataasinnaassapput.
- Periuseq nutaaq atorlugu oqaatsinik katersineq qaammatini pingasuni ingerlanneqassaaq, tassanilu pingaarnertut siunertaavoq nunatsinni innuttaasut oqaatsitsinnillu atuisuusut Oqaasileriffimmik piginneqataasutut misigalutik oqaatsitsinnik katersinermi peqataatinneqarnissaat, Katti Frederiksen, Oqaasileriffimmi pisortaq oqarpoq.
Postkortit oqaatsinik katersinermut atatillugu atorneqartussat 5000-it naqitertinneqarsimapput, Oqaasileriffiullu aaqqissugaanik oqaatsinik januaarimit marsi ilanngullugu katersisoqassalluni.
