Oqaasileriffik Ilitsoqqussaralugu Oqaatsit Ulluannut piareersarpoq
Naalagaaffiit Peqatigiit kulturikkut suliniaqatigiiffiata UNESCO-p ukiormanna qulequtaritippaa ’Local languages and Science’, kalaallisuunngorlugu: ’Najugarisami oqaatsit ilisimatusarnerlu.
Pisarneq malillugu Ilitsoqqussaralugu oqaatsit ulluat oqaasileriffiup malunnartissavaa, ukiormanna Ilimmarfimmi unnukkut nalunaaqutaq arfineq marlunniit qulingiluat qaangerlugu tanneq pingasut tungaannut.
Unnuup ingerlanerani oqaatsinik allanertanik atuisunit saqqummiussisoqassaaq soorlu Indonesiamiusut, norskisut, Savalimmiormiusut, kiniiserisut Belgiamiusut.
Taakkua saniatigut taallanik atuaasoqassaaq, torlussortoqassaaq aamma tunumiut ileqqorsuutaannik takutitsineqassalluni.
Ilimmarfimmut takkuttunut qarasaasiakkut kalaallisut atuffassissut siunnissami atorneqalersussaaq tusaatinneqassaaq.
Ilitsoqqussaralugu Oqaatsit ulluat nunatta atuagaateqarfiani malunnartinneqassaaq ualikkut nalunaaqutaq tallimanut qiteqquppat.
Tassani innuttaasut nunanit assigiinngitsunit pisut kaamattorneqarput atuagaq nuannarisartik nassarlugu atuffasseqqullugit.
Ilitseqqussaralugu oqaatsit ulluat illoqarfinni allani aamma malunnartinneqassaaq, tassalu Nanortalimmi, Qaqortumi, Narsami, Paamiuni aamma Qasigianguani.