Oqaaseq ukioq mannamut pigititaq danskisuujungilaq
- Oqaaseq ukioq mannamut pigititaq assersuutigalugu ukiut marluk qangiuppata ima eqqaasitsisinnaasariaqarpoq: Aap, ilumut taamani ukioq 2010-mi oqaaseq unarpiaq inuiaqatigiinni pisunik tamattalu misigisatsinnik ersersitsisuuvoq, Dansk sprognævnimi, tassa danskit oqaasileriffianni pisortaq, Sabine Kirchmeier-Andersen oqarpoq. Nangipporlu:
- Aamma oqaaseq taamaattoq, ukiualunni atuunnissaminut piukkunnartariarpoq. Tassa imaassanngilaq 2010-mi taamaallaat atorneqartoq, oqaatsitsigulli sivisunerusumi pisuujunerulersissavaatigut.
Siunnersuutigineqartut toqqaaniarnikkut sivisuukkut nassaarineqarput, inuit taasitinneqartasimallutik immikkullu ilisimasallit naliliisimallutik.
Dansk Sprognævnip pisortaa, Sabine Kirchmeier-Andersen, aammalu tusagassiortut Kim Bildsøe Lassen Ann Mariagerilu toqqaasussatullu ataatsimiisitaliami ilaasortaapput :
- Aap, vuvuzela. Qarlortaat qisummik sanaaq, isikkamik arsaalluni nunarsuaq tamakkerlugu pissartanngorniunnermi Afrikap kujasissortaani aasaq pisumi ilisimaneqalersoq, ilaannit nunannarineqarluni allanillu qinngarineqarluni:
Kisianni sooq vuvuzela?
- Isumaqarpunga Danmark ukiuni kingullerni nunaqarfeeqqatut pissuseqalersimasioq. Taamaammat Afrikap kujasissortaaneersumik oqasersiaqarnerput nuannaraara, tusagassiortoq Ann Mariager oqarpoq. Sabine Kirchmeier-Andersen ima tunngavilersuivoq:
- Vuvuzela nuannaarmermik ersersitsisuuvoq, nipinik qalipaasersuinerulluni. Pisumik, tamatsinnik nuannaalersitsisumik, eqqaasitsisoq. Aammalu kulturimut allamut inuunermullu allamut isaassinerusoq, aammalu silarsuarmut anginerusumut ilaanitsinnut paasinninnermut ersiutaaasoq.
Aammali immikkut ilisimasallit ilaat naammagisimaarinningilaq:
- Oqaatsip pinnissusiata saniatigut, danskit oqaasiisa amerlissutaatut oqatigineqarsinnaanngilaq, Kim Bildsøe Lassen oqarpoq.