Qaammat sinnerlugu nipaannersuaqareertoq, Erik Jensen Naalakkersuisunut siulittaasunngornissani naatsorsuutigilluinnarlugu pingasunngormat KNR-imut oqarpoq.Assi: KNR / Malik Brøns

Oqaannarluni Naalakkersuisunut siulittaasunngortoqarsinnaanngilaq

Siumup siulittaasua, Erik Jensen, naatsorsuutigisamisut Naalakkersuisunut imaaliallaannarluni siulittaasunngorsinnaanngitsoq, parteeqataata Karl-Kristian Krusep uparuarpaa.

- Partiimi siulittaasunngortoq, Naalakkersuisut siulittaasuat, Siumup Inatsisartuni gruppia kiisalu siulersuisuunerit oqaloqatigiinnerat suli pinikuunngimmat taanna siullermik erseqqissagassaavoq.

- Aamma tamakkualuunniit oqaloqatigiissutigineqarsimatinnagit siumoortumik oqaannarluni naalakkersuisunut siulittaasunngortoqarsinnaanngimmat taanna erseqqissarusunnarpoq, Siumup Inatsisartuni gruppiata oqaaseqartartua, Karl-Kristian Kruse, Inuiaat Tillernerannut sisamanngornermi oqarpoq.

AAMMA ATUARUK Erik Jensen: Naalakkersuisunut piffissami qaninnermi siulittaasunngornissara naatsorsuutigilluinnarpara

Taassuma Siumup siulittaasuata, Erik Jensenip, Naalakkersuisunut piffissami qaninnermi siulittaasunngorniarluni naatsorsuuteqarnera siusippallaamik nalunaaruteqarnertut nalilerpaa.

- Tunuliaquttat, tassalu Inatsisartut gruppiat, sulernermik aammalu oqaloqatigiinnerit killiffiannik avaqqunneqaqqaarsinnaanngillat. Taamaammat ilisimanngisatsinnik Naalakkersuisunut siulittaasunngornissamik avammut oqariartorneq taanna inissaminiinngilaq, Karl-Kristian Kruse oqarpoq.

Naatsorsuuteqartoq

Siumut siorna novembari naasoq ataatsimeersuarmalli naalakkersuinikkut nikittoqassanersoq ullumikkutulluunniit ingerlaannartoqqasanersoq oqallisaaqaaq.

Erik Jensenili Kim Kielsenilu partiimut siulittaasumik qinersereernermi nunatta naalakkersuinikkut aqunneqarnerani susoqarnissaa pillugu partiimi siulersuisuuninngortut siulittaasoq Erik Jensen siuttoralugu aalajangerumaaraat, KNR-imut oqarput.

Qinersereernerulli kingorna qaammat sinnerlugu nipaannersuaqareertoq, Erik Jensen Naalakkersuisunut siulittaasunngornissani naatsorsuutigilluinnarlugu pingasunngormat KNR-imut oqarpoq.

Kielsen itisileerusunngitsoq

Tamannalu pillugu Naalakkersuisut siulittaasuat, Kim Kielsen, Erik Jensenitulli partiimi siulittaasunngorniuuteqataasoq, KNR-imiit apersorniarlugu attaveqarfigigaluarparput. Allakkatigullu itisilerusunngisaminik ima akivoq:

- Tusarparput Erik Jensen ataasinngorpat Nuummut tikinniartoq, partiit allat siuttui oqaloqatigiartorlugit.

Erik Jensenip Siumukkormiut ataatsimeersuarnerminni anguaniagassatut siunniussaat Nuummi oqaloqatiginnittaqattaarnermini qitiutinniarlugit siusinnerusukkut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat