Ombudsmandi uparuaavoq

Isumaginninnermi Naammagittaalliuuteqartarfiup aamma Ilaqutariinnermut Pisortaqarfiup aalajangiineri kukkunerarlugit paamaarussillunilu suliamik ingerlatsisoqarnerarlugu, Inatsisartut Ombudsmandiat isornartorsiuivoq.
Allattoq Elisa Isaksen
decembarip 27-at 2010 16:12

Angut 39-nik ukiulik qaratsamigut aanaartoornermi kingornatigut nukillaarsimavoq, inuillu annertuumik innarluutillit ikiorserneqartarnerat pillugu Inatsisartut peqqussutaanni pineqartunut ilaatinneqalersimalluni.

Angut Danmarkimi paaqqinniffimmi sungiusarluni najugaqartinneqassasoq tapersersortitullu ikiorteqartitsinermut nalunaaquttap akunneri 160-it akuersissutigineqassasut, angutip taassuma taamani nuliarisaata nakkutilliisuatalu kissaateqarneri tunngavigalugit, Kommunip Ilaqutariinnermut Pisortaqarfimmut inassuteqaatigaa.

Ilaqutariinnermut Pisortaqarfiup qinnuteqaatit marluk taakku itigartitsissutigai, aalajangiinerillu Isumaginninnermi Naammagittaalliuuteqartarfimmut naammagittaalliuutigineqarlutik. Suliassarli unittoorsimavoq. Naammagittaalliuuteqartarfik aatsaat ukiut marluk qaammatillu pingasut qaangiunneranni tapersiivoq.

Suliap suliarineqarnerata nukingiunneqarnissaanik, Isumaginninnermi Naammagittaalliuuteqartarfiup aalajangiisimannginnera, Ombudsmandip isorisariaqartutut isigaa. Sungiusaaqqinnissamik qinnuteqaammik, Ilaqutariinnermut Pisortaqarfiup, angutip pineqartup peqqinnissaqarfimmi inaarlugu katsorsarneqarsimannginnera innersuussutigalugu itigartitsisimanera, Ombudsmandittaaq isornartorsiorpaa. Tunngavilersuut taanna inunnik annertuumik innarluutilinnik ikiorsiisarneq pillugu Inatsisartut peqqussutaanni pineqartunut angutip ilaatinneqarneranik unioqqutitsineruvoq.

Ombudsmandip allanneratut, suliaq qanoq sukkatigisumik pisortanit suliarineqassanersoq pillugu nalinginnaasumik malittarisassaqanngilaq, ingerlatsinermili ileqqorissaarnissaq aallaavigalugu suliat matumani pineqartutut ittut sukkasuumik suliarineqartartussaapput.

Suliat qanoq tulleriiaarnissaannut tunngaviusumik pisortaq malittarisassaqarsinnaanngilaq, sulialli ataasiakkaarlugit siullinngortinneqassanersut nalilersorneqartartussaasut, ombudsmandip aalajangiinerani erseqqissarneqarpoq.