Ombudsmandi saaffiginnittarfittut

Inatsisartut ombudsmandeqarfiat ukiuni qulinngortuni atuutereerluni oqaatigineqarsinnaanngorsimavoq pisortaqarfiit naammagittaalliutigineqarneranni pinngitsoorneqarsinnaajunnaarsimasoq kikkunillu tamanit ilisimaneqartariaqavissoq, ombudsmandillu nalunaarutaa inatsisartuni ullumi qujamasuutigineqarpoq. Ombudsmand Vera Leth nammineq oqarpoq tamanna inatsisartut tatigininnerattut isigigini.

Namminersornerullutik Oqartussanut, kommuninut aammalu soorlu ulloqeqqanut eqqartukkatsitut Ini A/S-imut ombudsmand aqqutigalugu maalaarutit inatsisit allannguuteqartinnissaannut sakkussanik ombudsdmandip nalunaarutaata imaqartuarnerata aamma innuttaasunit ilisimaneqarnerunissaa aqqutissioqquneqarpoq, apeqqullu taanna ombudsmand Vera Lethip isumaqarfigaa soorunami kissaatiginartoq innuttaasut amerlanerusut nalunaarutini atuartassagaat, kisianni naammagittaalliutit pisortanut tunnganerusarmata neriuutigigini pisortat sullissinermik pitsaanerulersinneratigut inuit malugisassagaat suliaq qanoq kinguneqarsimanersoq.

Aammali pisortaqarfinnut naammagittaaliutit saniatigut maalaarutit assigiinngittaqaat, soorlu inunnik isumaginninnermut naammagittaalliutit, soraarsitsinerit, ineqarneernut tunngasut aamma akiliisitsiniarnernut tunngasut – tamakkulu paarlakaallutik amerlanerusarlutillu ikinnerusarlutik, Vera Leth oqarpoq.

Naammagittaaliutilli tamarmik 40%-ii itigartitsissutaasarput, ilaatigut pisoqalisoorsimanerat pissutigalugu imaluunniit allamut naammagittaaliuutigeqqagassaasaramik, ilami ombudsmandip pisinnaatitaaffiginngisaanut tunngasinnaagamik soorlu eqqartuussivinnut politiinuluunniit naalagaaffiup ingerlataanut, Vera Leth oqaluttuarpoq.

Taamaakkaluaq ombudsmandi maanna inississimavoq naatsorsuutigineqarsinnaanngorluni suliat amerliartornerat uuttuutigalugu.