Ombudsmandi Naalakkersuisoqarfimmut sakkortuumik uparuaavoq
Timmissanut tunngasumik nalunaarutissaq, 2008-mi 2009-milu taamanikkut Naalakkkersuisuusunit suliarineqartoq pineqartoq, Sermitsiami ippassaq saqqummersumi allaaserineqarpoq.
Suliaq arlaqartunut tunngatillugu maalaaruteqarfiusoq timmissanik soqutigisallit peqatigiiffiannit "Timmiaq"-mit suliakkiissutigineqarpoq, ilaatigullu Naalakkersuisoqarfiup nalunaarutinut nutaanut tunngatillugu tusarniaasussaatitaaneranut tusarniaanerullu sivisussusissaanut tunngasuulluni.
Timmissat pillugit nalunaarutissamut nutaamut atatillugu "Timmiaq" tusarniaaffigineqarsimanngilaq, tusarniaaffigisassallu allat, soorlu piniartut kattuffiat nalunaaquttap akunnerinik sisamanik akinissamut periarfissalerlugit tusarniarneqarsimapput.
Nalunaaquttap akunnerinik sisamanik piffissaliilluni tusarniaaneq Vera Lethip sivikippallaarujussuartutut isornartoqarpallaartutullu isumaqarfigaa.
- Isumaqarpunga akunnerit sisamat atorlugit tusarniaaneq minnerpaaffissatut killiliussamik unioqqutitsinerusoq, ombudsmandi oqarpoq.
Timmissat pillugit nalunaarutissap suliarineqarneranut atatillugu peqatigiiffiup "Timmiap" suleqatigiissitamut ilaanerminut atatillugu nipangiussisussaatinneqarmat, Vera Lethip aamma isornartorsiorpaa.
Hasse Hedemandip peqatigiiffimmit "Timmiaq"-meersup ombudsmandip taamatut qisuariaateqarnera nuannaarutigaa, siunissamilu Namminersorlutik Oqartussanik suleqateqarluarnissartik neriuutigalugu.
