Ombudsmandi kujataani angalasoq

Sulitilluni ajoqusernermit taarsiiffigitinnissamut periariarfissat qanoq inneri paasissutissiissutiginiarlugit Inatsisartut Ombudsmandiat Sulitillunilu Ajoqusernerit pillugit Sullissivik kujataani angalaarput.
Assi © : KNR
juunip 02-at 2017 07:54

- Sulitilluni ajoqusernerit pillugit nalunaarutiginninissamut periarfissat pillugit paasissutissiivugut. Innuttaasunut, kisianni aamma suliffeqarfinnut sulisitsisunullu. Sulitillunimi ajoqusernerit pillugit nalunaarutiginnittussaatitaanermik pisussaaffeqarput, Sulisilluni Ajoqusernerit pillugit Sullissivimmeersoq, Therese Hansen nassuiaavoq

Aammattaaq paasissutissiissutigaat eqqunngitsumik pineqarsorinermi Inatsisartut Ombudsmandianut maalaarummik nassiussisoqarsinnaasoq.

- Pisortanut ikiorsiissutinik qinnuteqarsimagaanni itigartitaasimallunilu, pisortalluunniit suliffeqarfiutaanni sulisoq sulisitsisuminit eqqunngitsumik mianersoqqussuteqarfigineqarsimappat. Ombudmandimut naammagittaalliutaasinnaasut tamakkuusinnaapput, Inatsisartut Ombudsmandianni siunnersortit pisortaat, Lasse Risager oqarpoq.

Sulitilluni ajoqqusernerit pillugit Sullissivimmeersut, Inatsisartullu Ombudsmandeqarfianeersut ukiumut ataasiarlutik Sinerissap ilaanut suliatik pillugit paasititsiniaasarput. Siorna avannaaniisimapput.

- Imaasinnaavoq Kalaallit Nunaata ilaanni Ombudsmandi ilisimaneqanngitsoq. Taamaammat isumaqarpugut angalasarnissagut pisariaqartuusut. Inuit amerlasuut sulerinersugut paasiniarniassammassuk imaluunniit oqaloqatigaluta. Nuummi allaffeqarfeqaratta Nummiut kisimik tikilluta oqaloqatiginissatsinnut periarfissaqartariaqanngimmata, Lasse Risagerilu oqarpoq.

Innuttaasut pisinnaatsitaaffiisa ilaanik kujataani paasititsiniaasut ippassaq Aappilattuniipput, ullumilu Tasiusamiisallutik.