Ombudsmandi akineqapallappoq
Avatangiisinut illersuiniat 80-it Skotlandimiut uuliasioqatigiit Cairn Energyp Edinburgimi qullersaqarfiat ullaaq isaaffigimmassuk Greenpeacep piumasaqataa oqallisaaqqilerpoq. Sillimaniarnermut pilersaarutit nammineerlutik aaniarlugit isaapput. Sillimaniarnermullu pilersaarutit nassaariuminaassappata qullersaqarfimmi assiaqutsersuiniarlutik piareersimaffigalugu, Greenpeacemit tusagassiutinut nalunaarummi oqaatigaat.
Pilersaarutit uuliasiortunit saqqummiunneqartarneri naliginnaasuuvoq. Cairn Energylu maannamut taamaaliorusussimanngilaq oqarluni, Greenpeacep pilersaarutit atornerlullugit misiliilluni qillerinerit unitsinniarnerannut atussagaat. Maqisoortoqassagaluarpat saliiniarnermut akorngusersuillutik atorsinnaagaat aarleqqutigigamikku Namminersorlutik Oqartussat piumasarisimagaat pilersaarutit isertuunneqassasut. Greenpeacemilli pilersaarutit taama atorneqarnavianngitsut oqaatigineqarpoq.
Edinburgimilu Greenpeacekkut pisoqartitsinerisa nalaanni nunatsinni ombudmandip sillimaniarnermut pilersaarutit tamanut ammasumik saqqummiunneqarnissaannut juunip aqqarnanni saaffiginnissummut Aatsitassanut Ikummatissanullu Pisortaqarfik akissuteqartinniarsaraa.
Maannamulli saaffiginnissutit asuliinnaarsimapput. Allanik tuaviuussassanik suliaqarneq aasaaneranilu sulinngiffeqartoqarnera Pisortaqarfiup utoqqatsissutigisimavaa. Ombudsmandilli naammagittarsinnaanera killeqarpoq. Vera Lethip pingasunngormat apeqqutigaa qaqugu akissuteqartoqarumaarnersoq.
Pisortaqarfimmilu pisortaq Jørn Skov Nielsen maanna neriorsuivoq suliaq sukkatsisassallugu, ullumi - ullut suliffiusut marluk qaangiutiinnarneraniit - Ombudsmandip apeqqutaa akineqassasoq.
Jørn Skov Nielsenilli oqaatigaa akissut Ombudsmandip apeqqutigisimasaanik akissutaassanngitsoq. Pisortaqarfiulli sulineranut sooq sulinngiffeqarnerit angalanerillu arriillisaataasimanerannik nassuiaataassalluni. Tusarniaatinullu akissuteqarnissamut piviusorsiortumik ulluliisoqassaaq.
Sillimaniarnermut pilersaarutit tamanut saqqummiunneqassanersut Ombudsmandimit oqaaseqarfigineqarnissaa suli sivisuumik utaqqineqarsinnaavoq.
