Olympiadep innera Qalasersualiaakkaat
Inneq taanna russit sikusiussuisa atomip nukinganik ingerlatillit ilaannik assartorneqarpoq, umiarsuarmilu ilaasut ilagaat Christian Marcussen Kalaallit Nunaata Danmarkillu ujarassiuutut mississuisoqarfianit GEUS-imeersoq.
- Olympiadep innera poorlugu tikiunneqarpoq umiarsuarmullu ikaanneqarluni. Pingaartorsiornaqaaq. Issittormi russinit pingaartinneqartupilussuuvoq, Ritzauimut oqarpoq.
Olympiadep innera ukiuunerani Olympiadertoqarnissaata tungaanut Rusland tamakkerlugu angallanneqartussavoq, maanna tassa Qalasersuarmut ingerlanneqarluni. Sikusiussuarmuttaaq ilaapput Issittumi Siunnersuisoqatigiit aallartitaat, sikusiussuarlu Qalasersuarmut apuuppat arpattartut nunanit assigiinngitsuneersut naneruarfinnik sikumut ilioraassamaarput.
- Russit Issittumi Siunnersuisoqatigiinneersunik qaaqqusinerat takussutissiiniarnertut isigineqassaaq, Christian Marcussen oqarpoq, tamannalumi aamma Sergej Kirienkop, naalagaaffiup ingerlasteqatigiiffiani, russit sikusiutaannik atomip nukinganik ingerlatilinnik ingerlatsinermik isumaginniffiusumi pisortap ilumoornerarpaa.
- Taamatut angalanerup Issittumi Siunnersuisoqatigiinnut ilaasortat akornanni ataqatigiinnermut Issittullu pinngortitaata immikkuullarissup serniginissaanik ataatsimut anguniagaqarnerannut assersuutissaqqissuunissaa qularutiginngilarput, Kirienko tusagassiorfinnut nalunaaruteqarluni taama oqarpoq.
Olympiadep innerata Qalasersualiaanneqarnerata kingorna Ruslandimi angallanneqareerpat, aamma tasersuup Baikalip naqqanukaanneqassaaq Kaukasusimilu Elbrusip qattaata nuuanut kilometerinik tallimanik portutigisumukaanneqassalluni.
