Olympiademi ikumatittagaq naggueqatitta angallanniarpaat
Olympiadeqarnerani ikumatitaq nunami unammiffiusumi ingerlaartinneqartarpoq. Ukiukkut Olympiademi unammersuarneq aappaagu Canadami Vancouverimi ingerlanneqassaaq. Unammersuarnermilu nunap inuiisa inissisimanerat maluginiarneqartussaavoq. Ukiukkut Olympiademi unammersuarnermi ilisarnaatitut Inuksuk atorneqassaaq. Taamaattumik unammersuarnissaq naggueqatigiit inuit eqqillillu arlalitsigut akuutinneqarput.
Olympiadeqarnerani ikumatitap Canadami angallallugu ingerlaartinneqarnera maannakkut Canadap sineriaata kitaanniit aallartillugu ingerlanneqarpoq oktoberip qaammataata tungaanut angallanneqassalluni, aappaagu 2010-imi februaarip qaammataani Vancouverimut apuunneqarnissaata tungaanut.
Naggueqatigiit Inuit inuusuttut qulit ikumatitamik tigumiartussaapput. Ikumatitaq Nunavummi, Nunatsiavummi Inuvialuimmilu ingerlaartinneqarnerani naggueqatigiit inuit inuusutut arfineq marluk tigumiartuussapput.
Taassuma saniatigut naggueqatigiit Inuit inuusuttut pingasut 19-init 25-it tungaanut ukiullit ikumatitap Canadami tamarmi ingerlaartinneqarnerani malinnaassapput, ikumatitap qanoq nakkutigineqarsinnaanera ilitsersuutigissallugu. Ikumatitaq Vancouverimut apuunneqarpat ikumatitap ikumatiinnarneqarnissaa inuusuttut isumagissavaat, taamaaliornermikkut issittumi nunaqarfimmi innuttaasut inuulluaqqussutaattut isigineqassalluni.
