Oluf Palme kilitsissianit toqunneqarsimanerarneqarpoq
Kilitsissiaasimasup Tysklandimi 2008-imi killisiorneqarneranit paasissutissat pissarsiarineqarput, tyskit aviisiat Focus taamatut allaaserisaqarpoq.
Jugoslaviami kilitsisissiaasimasup 67-inik ukioqartup, Vinko Sindicip oqarnera malillugu, Svenskit ministeriunerisimasaat, Jugoslaviami kilitsissianit ulloq unnuarlu malinnaaffigineqarsimavoq isumannaallisaanikkut sanngiiffigineqartut paasiniarlugit.
Akililersilluni toqutsisartumit, ullumikkut Kroatiap illoqarfiisa pingaarnersaanni Zagrebimi najugaqartumit, Olof Palme toqunneqarsimagunarpoq, taannalu maannakkut 65-inik ukioqarpoq, illersuiniaqatigiiffimmi namminersortumi sulisuulluni.
Kilitsissiaasimasup Sindicicip aamma oqaatigaa, aallaat Smith & Wesson toqutsinermut atorneqarsimasoq, taamanilu USA-miit umiarsuarmik Stockholmiliaanneqarsimalluni.
Paasissutissat 2008-mili Sverigemut tunniunneqarsimapput, svenskilli politiivi suliaq ingerlateqqissimanngilaat.
Norskit nutaarsiassaqartitsiviata NTB-p paasisai malillugit politiit oqarsimaneragaapput, paasissutissat maanna misissorneqalersut.
Februaarip 28-ani 1986-mi Olof Palme Stockholmip aqquserngisa ilaanni toqutaavoq. Oluf Palme nulianilu filmertarfimmiit angerlarnerminni toqutaavoq. Toqutsisutut pasineqarluni Christer Pettersson eqqartuussaagaluarpoq, kingornali pinngitsuutinneqarluni. Olof Palmemik kina toqutsisimanersoq ulloq manna tikillugu suli paasineqanngilaq.
Jugoslaviami illoqarfiit pingaarnersaanni, Beogradimi kroatiamit qimaasut tassanilu najugaqartut toqutsisimasutut pisuutinneqarnissaat siunertaralugu, naalagaaffiup isertortumik paasiniaasartui, Udba-meersut pasisaarisut, Vinko Sindicip oqaatigaa.
