OLT-mut ilaasut EU-mi allaffittaassapput
Nunat OLT-mik aaqqissuussinermut ilaasut EU-p Bruxellesimi qitiusumik allafianut qanittumi allattoqarfeqarlerpata, Nunatta kissaatai EU Parlamentimit tusarneqarsinnaanerulissasut, Kuupik Kleist isumaqarpoq.
- Malittarisassat nunatsinnut atuuttut malillugit Canadamiut raajanik EU-mut tunisisinnaalernerat, Nunatta EU-llu isumaqatigiissutaannik qarajartuineruvoq. Tamannalu naapertuutinngitsoq, Kuupik Kleist oqarpoq.
- Isumaqatigiissutitta qarajarneqannginnissaat, tassalu nalingisa millisarneqannginniissat uagutsinnut pingaarnerpajuvoq.
OLT tassaavoq nunat EU-mut ilaasortaasut qanga nunasiaatigisimasaat, maannakkullu aningaasarsiornikkut inuuniarnikkullu atukkat pillugit EU-mik suleqateqartut.
Kuupik Kleist isumaqarpoq, Nunat OLT-mik aaqqissuussinermut ilaasut tapiissutinik amerlanerusunik pissarsisarusukkunik saqqumilaarnerusariaqartut.
- Tassa Europaparlamentimut saqqumilaarnerusariaqapugut, naalakkersuisut siulittaasuat oqarpoq.
Nunat OLT-mut ilasut neriuutigaat, EU-mi allattoqarfittaarnikkut kissaatitik tusaaniarneqarnerulissasut.
- Allattoqarfit, nunat OLT-imut ilaasut suliniutaannik kissaataannillu ataqatigiissaarisartussaaq, Kuupik Kleist oqarpoq.
EU-p nunallu OLT-imut ilaasut ukiumoortumik ataatsimiinnerat ullumi naammassivoq.