Olsvigip periaaserineqartoq apersuuserpaa
Kalaallit Nunaata peqataajunnarnerani suleqatigiissitanut ilisimatusarnikkullu suleqatigiinnermut aamma atuunnersoq Olsvigip paaserusuppaa. Sara Olsvigip naalakkersuisunut apeqqutigaa Naalagaaffeqatigiit ataatsimoorlutik nalunaaruteqarsimasinnaagaluarnersut taamaalillutillu naalagaaffeqatigiit ataatsimiinnissamut ornigutinngitsuuginnarlutik.
Norgemiut aallartitaasa saamit oqaaseqarnissaannut periarfissippaat, Villy søvndalillu Savalimmiormiut aallartitaata oqaaseqarnissaanut periarfissillugu, Sara Olsvigip paaserusuppaa Nunarput oqaaseqarnissaminut Danmarkimit aamma periarfissaqartinneqarsimanersoq. Kiisalu aamma Siunnersuisoqatigiinni siulittaasunngortunut canadamiunut “isumaqatigiinniarnerit piviusumik ingerlanneqalernerat” qanoq iluseqarlutik Naalakkersuisunit ingerlanneqassasnersoq Olsvigip paaserusuppaa.
-Nunat tamalaat suleqatigiiffiini tusaaneqarnissaq pingaaruteqartupilussuummat, Naalakkersuisut aalajangersimasinnaagaluarput ministerit Kirunami ataatsimiinneranni peqataassallutik, peqataanikkummi Kalaallit Nunaannit oqariartuutigiumaneqartut saqqummiunneqarsinnaassagaluarmata. Tamannali Naalakkersuisunit kissaatigineqarsimanngilaq, taamaammallu taamatut Naalakkersuisunit peqataajumanani aalajangersimaneq sunik tunngaveqarnersoq aammalu siunissami qanoq pinngitsoortinneqarsinnaanersoq paasisaqarfigissallugu Inatsisartunut pingaaruteqarpoq, Sara Olsvig Naalakkersuisut siulittaasuannut § 37 naapertorlugu apeqquteqaatiminut atatillugu nassuiaavoq.