Demokraatit: Olsvigip oqaasii upperinngilluinnarpavut
Isornartorsiuingaatsiarnerit nutaat Demokraatit siulittaasuannit Randi Vestergaard Evaldsenimit isornartorsiuinerupput, taassuma Sara Olsvigip Inatsisartuni suliat pingaaruteqartut piffissami sivikitsumi suliarineqarsimaneranut nassuiaataa ilorrisimaarutiginngilaa.
AAMMA ATUARUK Isummat assigiinnginnerat tuaviuussamik inatsisiliornermi peqqutaavoq
- Taanna isumaqarpunga imminut eqqarsaatiginerusoq, aammalu demokrati tunngavigalugu suleriaatsit ataqqineqanngitsut. Taamaammat isumaqarpunga kusanaattorujussuusoq Sara Olsvig taamannak imminut pingaartilluni Inatsisartullu suliaat pingaartinnagit inissittoq, Demokraatit siulittaasuat Randi Vestergaard Evaldsen taama oqarpoq.
Naalakkersuisoqatigiinni isumaqatigiinnginnerit pissutigalugit suliat arlaqartut ukiakkut ataatsimiinnermi tuaviuunneqartut, Sara Olsvigip sapaatip akunnerani matumani KNR-imut nassuiaatigaa. Randi Vestergaardip isumaqatigiinnginnerit paasisinnaalluarnerarpai, oqaluuserisassallu piffissaqarluarluni suliarineqarnissaat pillugu upernaamut kinguartinneqarsinnaanissaat siunnersuutigalugu:
- Tupinnartuliaanngilaq partiit assiiginngitsillugit isumaqatigiinngitsoqartartoq, eqqartugassallu assigiinngitsuusartut, kisianni isumaqarpunga isumaqatigiinngikkaanni kinguartinneqartariaqartut
. Assersuutigivarput, qasseriarluta aamma taallugu soormi upernaamut kinguartinneqarpata? Taava tamatta piffissaqarluarluta suliarissagaluarpagut. Imatuunngitsoq: Inatsisartuni issiasugut ullualuit kisiisa atorlugit suliaqartissagaatigut. Qaammaterpassuit namminneq suliarivaat, uagut ullut talllimat. Tamanna atorsinnaanngilaq, Randi Vestergaard Evaldsen taama oqarpoq.
Sara Olsvigip KNR-imut erseqqissaatigaa aamma nammineq aalajangiinissat pingaaruteqartut nunatta siunissaanut aningaasaqarneranullu kinguneqartussat piffissaqarfigalugit aalajangiiffigineqartariaqartut. Sara Olsvigilli oqaasii Randi Vestergaard Evaldsenip upperiumanngilai:
- Oqaatigisai uani upperinngilluinnarpakka. Oqaatsini pimoorussimasuugunigit suliat ukua upernaamut 2018-imut kinguartissimassagaluarpai. Taamaammat oqaatigisai uanga upperisinnaanngilluinnarpakka, Demokraatit siulittaasuat Randi Vestergaard Evaldsen taama oqarpoq.
