Olsvigip danskit naalakkersuisunik allanngortiterinerat sunniuteqarnaviangilaq
Naalakkersuisunik paarlaaneq Kalaallit Nunaat Danskillu suleqatigiinerannut sunniuteqaqataasinnaavoq.
Taamaakkaluartoq kalaallit folketingimi ilaasortaatitaat Sara Olsvig isumaqarpoq sunniuteqarpallaarnavianngitsoq.
- Uanga folketingimi ilaasortaaninni pingaartiinaavinnikuuara partiit folketingimiitut saamerliuniartuuppata talerperliuniartuuppataluunniit tamaaviissa suleqatigisinnaanissaat. Taamaatumillu aamma politikkikkut partiinut ataasiakkaanut pituttornikuunngilagut, taamaattumillu massakkut SF-ip naalakkersuinikkut peqataajunnaarnerat imatorsuaq sunniuteqarnissaa naatsorsuutiginngilara, Sara Olsvig oqarpoq.
Pissangassutigineqarporli kikkut avatangiisinut aamma nunanut allanut naalakkersuisunngussanersut.
- Issittoq eqqarsaatigalugu uagut Inuit Ataqatigiit folketingiminngaaniit soorunami nunanut allanut ministeria qanimut suleqatigiuartarnikuuarput, siunissamilu taamaattuassalluta. Taamaattumik sooruna pissanganarpoq kina minnerunngitsumik nunanut allanut ministerinngussanersoq Danmarkimi massakkut, Sara Olsvig oqarpoq.
Kikkut naalakkersuisunngortissaneraat suli nalunarpoq.
Taamaakkaluartoq Sara Olsvigip eqqoriarpaa Radikale Venstre-miit nunanut allanut ministerinngortoqassasoq, ministeriuneq Social Demokratininngaaneermat.
- Tassanilu immaqa Morten Østergaard taaneqarsinnaavoq imaluunniit assersuutigiinnarlugu massakkut ministeriiunnaarnikuugaluartoq Christian Friis Bach. Taassuma ministeriunermini suliani pitsaasorujussuarmik ingerlannikuugamigit, takorloorneqarsinnaavoq taanna uteriataarsinnaasoq ministeritut, Sara Olsvig oqarpoq.
