Olsvig saammaasseqatigiinnissamut isumalioqatigiissitat pillugit: Taperserpagut

Saammaasseqatigiinnissamut isumalioqatigiissitat suliaat tamattaalluta tapersersortariaqarpagut, Inuit Ataqatigiit siulittaasuat, Sara Olsvig, isumaqarpoq.

- Pilersinneqareerpoq, taamaammat sulinera aamma ataqqisariaqarparput, taama uagut isumaqarpugut, KNR-imut oqarpoq.

Kikkut isumalioqatigiissitanut ilaasortaanissaannik ippassaq nalunaaruteqareersorlu Sara Olsvigip taama oqaaseqarpoq.

Saammaasseqatigiinnissamut isumalioqatigiissitat sunik suliaqassanersut tusagassiorfinnut nalunaarummi aamma naatsumik nassuiarneqarpoq.

AAMMA ATUARUK Saammateqatigiinissamut Isumalioqatigiissitaq piviusunnguleqaaq

Ilaatigut "inuiaqatigiinni assigiinngisitaartoqarneranik paasinninnermik pilersitsinissaq" pillugu suliniuteqartoqassaaq sulinerlu isumalioqatigiissitap nittartagaatigut innuttaasunit malittarineqarsinnaassalluni.

Immikkut ilisimasalinnik, ilaatigut oqaluttuarisaanermik immikkut ilisimasalinnik, inuiaqatigiilerisunik perorsaasunillu ilaasortaqartitsisoqarnera Inuit Ataqatigiinnit iluarisimaarneqarpoq.

- Isumatusaarnerorpasippoq, aamma isumalioqatigiissitanik maanna toqqaasoqarnera ataqqivara. Suliatigut piginnaasaasa ataqqineqarnissaat naatsorsuutigaara, aamma Naalakkersuisut piumallerunik isumalioqatigiissitanik atorunnaarsitsisinnaajunnaarlugit aaqqissuussisoqarsimanissaa naatsorsuutigaara, Sara Olsvig oqarpoq.

Iliuuseqarnissamut kiffaanngissuseqarnissaq

Saammaasseqatigiinnissamut Isumalioqatigiissitat sulinissaannut, aggustimi pimoorussamik aallartittussamut, aningaanut inatsisikkut 2014-imut ukiunullu tulliuttunut pingasunut ukiut tamaasa 2,4 millionit koruuninik aningaasaliisoqarpoq. 

Isumalioqatigiissitanut ilaasortanik toqqaasoqarnerata saniatigut aamma politikkikkut malinnaasussaanik partiit nammineq toqqagaannik ilaasortalimmik pilersitsisoqarpoq. Taakkulu isumalioqatigiissitat sulinerat "nakkutigisussaavaat". Tassungalu Sara Olsvig ilaasortaavoq.

- Isumalioqatigiissitat suliatigut ilisimasatik toqqammavigalugit kiffaanngissuseqartinnissaat iliuuseqarsinnaanissaallu naatsorsuutigaarput, Sara Olsvig oqarpoq.

AAMMA ATUARUK Demokraatit Naalakkersuisunut: Puigugaqanngilasi?

Isumalioqatigiissitat suliaat sunniuteqassappata tamat ataqatigiittariaqarnerat innuttaasullu tamaasa peqataatinneqartariaqarnerat erseqqissaatigaa. Sulineq aggustimi aallartinneqariarpat innuttaasut suliamut qanoq peqataatinneqarnissaannut iliuusissatut pilersaarummik saqqummiussisoqarnissaa Olsvigip aamma naatsorsuutigaa.

Partii Inuit isumalluarput

Saammaasseqatigiinnissamut isumalioqatigiissitat pilersinneqarnerat Partii Inuit aamma iluarisimaarpaat.

- Naalakkersuinikkut anguniagassat pillugit ilungersuutigisimasatta ilaat timitalersorneqarlutik maanna naalakkersuisunit iliuuseqarfigineqarmata isumalluarluta nuannaarutiginninnissarput pissusissamisoortutut isigaarput, Partii Inuit siulittaasuat Nikku Olsen tusagassiorfinnut nalunaaruteqarluni taama allappoq.