Olsvig: Nunatta USA-llu suleqatigiinnerat nutaamik eqqarsaatigeqqittariaqarparput
- USA-mut ullumikkut atassuteqarnerput ilisimatusarnermik, illersornissamik amerikamiullu Thule air Basemik ingerlatsinerannik tunngaveqarneruvoq. USA-mik suleqateqarnitta assigiinngitsutigut annertusarlugu nutaamik eqqarsaatigeqqinnissaa pisariaqartoq isumaqarluinnarpunga. Ilaatigut takornariartitsinikkut, niuernikkut aningaasaliisarnikkullu suleqatigiinnissamut periarfissat misissortariaqarpagut, Sara Olsvig ataatsimiinnerup kingorna oqarpoq.
Rufus Gifford USA-p Danmarkimi aallartitaatut 2013-imi aasakkut aallartippoq. Amerikamiullu aallartitaattut atorfininnermini suliaasa siulliit ilagaat Nunatsinnut tikeraarnissaq.
- Isumaqarpunga Nunatta kimmut sanilerisatsinnit suleqateqarnerani periarfissat atorluarneqanngitsut arlaqartut. Washingtonimi sinniisoqarfittaassaq soorunami tamatumunnga aqqutissiuisuussaaq, Joint Committeekkulli suleqatigiinnerup Thule Air Basellu Nunatsinnut qanoq iluaqutaatigineri ingerlaavartumik eqqartortuartariaqarpagut. Amerikamiut aallartitartaavannik pitsaasumik attaveqalernera nuannaarutigaara, Sara Olsvig oqarpoq.
