VIDEO Olsvig: Naalakkersuisut tunuliaqutserneqanngillat
Siunnersuutit Naalakkersuisooqatigiinni partiinit pingasunit aammalu illuatungiliuttunit innuttaasuniillu annertuumik isornartorsiorneqareersut tamanna pivoq.
Inuit Ataqatigiit siulittaasuata Sara Olsvigip tamanna naalakkersuisuni tukattumik ingerlatsisoqarneranut takussutissaasoraa.
- Erseqqissumik takuneqarsinnaavoq Naalakkersuisut tunuliaqutserneqarnerat massakkorpiaq peqanngitsoq, tassa tunuliaqutserneqanngillat aningaasanut inatsisissatut siunnersuutiminnut.
Aamma atuaruk Akitsuutissatut siunnersuutit Uldumimit tunuartinneqarput
- Tamannalu illuatungiliuttuusutut aammalu isumaqatigiinniaqataasussaasutut nalorninartorujussuarmik inissiivoq. Uagut ilisimanngilarput maannakkorpiaq suna tunngavigalugu isumaqatigiinniarneq ingerlanneqarnersoq, Sara Olsvig KNR-imut taama oqarpoq.
Inuit Ataqatigiit siunnersuutip ilaa aallaqqaataaniilli isumaqatiginngilaat, tassalu neqinut eqqussukkanut akitsuutip qaffanneqarnissaa, partiimi isumaqarpoq tamanna innuttaasunut aningaasaqarniarnikkut tatineqareersimasunut eqquinerlussasoq.
- Oqaatigerusuppara akitsuusersuineq tassaannaavoq maannakkuugallartumik aaqqiineq. Uanilu oqallinnermi ullumikkut ingerlasumi uanga ujartoraluarpara piffissaq ungasinneq pillugu aammalu naleqartitat suut inuiaqatigiit ineriartortinniarnerigut, Sara Olsvig oqarpoq.
Aamma atuaruk Aningaasanut Inatsit naalakkersuisoqatigiinik avissaartuutsitsivoq
Neqinut uuliamullu akit inissinneqartariarput
Taamaammat illuatungiliuttut siulittaasuata Naalakkersuisut nunatta karsianut aningaasameertumut sutigut aningaasanik pissarsisinnaassanersut pissangalluni utaqqinerarpaa.
- Oqarnittut, apeqqusigaqarpugut, assersuutigalugu neqinut akitsuutit, taakkua eqquinerluttorujussuusussaammata. Aammalu ullumikkut erseqqissorujussuarmik oqaatigaarput uuliamut akitsuut atorneqassappat, taava innuttaasunut pisisartunullu uuliap akianik qaffaannginnissaa uagut piumasaqaatigissavarput.
- Kisianni takussavarput Naalakkersuisooqatigiit namminneq akunnerminni suna isumaqatigiissutigisinnaassaneraat.
Aningaasanut inatsisissatut siunnersuut novembarip pingajuani pingajussaaneerneqassaaq.
