Olsvig Hawaiimiittoq

Isumasioqatigiinnermi ilisimatuut ilisimatusarfiillu Issittut pillugit suliaqartut Nunanillu Issittuneersut arlalissuit peqataassapput. Oqalugiartussarpassuit tassaapput ilisimatuut avatangiisit ulorianartorsiortinneqartut pillugit qulaajaasussat, Issittuni umiarsuit ingerlaartarfiinik ineriartuinermi pitsaanerusumik atugaqalersinnaaneq pillugu saqqummiisussat, aamma uuliasiorneq gassisiornermillu suliffissuaqarneq pillugu, allanillu suliffissuaqarnerit pillugit ilisimatuut oqalugiartussat.

- Nunap assingatigut Nunat Issittut isiginnaarutsigit takusinnaavarput imartat arlallit Issittumi eqqaanilu naapiffeqartuusut. Tamanna eqqarsaatigalugu Manerassuup avannarpasissua amerlasuutigut puigorneqartartutut ittarpoq. Manerassuarmi avannarpasissormiut namminneq Issittuni inissisimanertik qanoq isigineraat tusarfigissallugu qilanaareqaara. Ukioq manna Japan, Sydkorea aamma Kina Issittumi Siunnersuisooqatigiinnut aalaatsinaattunngorput, nunanillu taakkua Issittumik qanoq soqutigisaqarnerat isumasioqatigiinnermi tusagaqassaagut, Sara Olsvig nassuiaavoq.

Ataatsimeersuarneq qulequtserneqarsimavoq North Pacific Arctic Conference aaqqissorneqarsimavorlu the East-West Centerimit aamma the Korea Maritime Institutemit, taakkulu Issittut pillugit ataatsimeersuartitsinerisa pingajussarivaat. Sammineqartussat ilagaat pissutsit unamminartut periarfissallu ukunani: Umiarsuarnik assartuinermut tunngatillugu, uuliasiornermik gassisiornermillu ineriartuinermut tunngatillugu aammalu aalisarnermut tunngatillugu. Tamakku saniatigut inuiaqatigiini ineriartorneq aammalu Nunani Issittuni naalakkersuinermut tunngatillugu qanoq ililluni suleqatigiiffiusunik nukittuunik pilersitsisoqarsinnaanersoq sammineqassapput.