Olsvig: Aningaasanut inatsisissamut isumaqatiginninniarnissat toqqissisimananngillat

Nunatsinni Naalakkersuinikkut massakkut ingerlatsineq akuersaarnagu, Inuit Ataqatigiit siulittaasuata Sara Olsvigip, partiit illuatungiliuttut allat peqatigalugit ataatsimoorlutik nalunaarutigaat, assersuutigalugu aappaagumut aningaasanut inatsisissatut siunnersuut pillugu isumaqatigiinniarnissat toqqissisimananngitsut oqaatigalugu:

- Aningaasanut inatsisissaq pillugu toqqissisimananngilaq illuatungiliuttutut ilisimanagu, aamma takusinnaanagu sunarpiaq isumaqatiginninniutigineqarniarnersoq. Sorpiaanukua tunngavigalugit Naalakkersuisut saqqummiussisut politikkikkiminnik. Tunuliaquteqarpat? Tamanna aamma apeqquterujussuanngorpoq, Inuit Ataqatigiit siulittaasuat Sara Olsvig KNR-imut oqarpoq.

Aappaagumut aningaasanut inatsisissatut siunnersuut pillugu Naalakkersuisoqatigiinni ilaasortat ilaat akerliuniarlutik taasiniartut aamma arajutsisimanngilaat:

- Aningaasanut inatsisissatut siunnersuut saqqummiunneqarnerata kingorna, Naalakkersuisoqatigiit ilaasortaatitaasa ilaannit ilaatigut nalunaarutigineqarpoq siunnersuut taama isikkoqartillugu tapersersuiniaratik taaseqataaffiginiarnagulu. Taavalu aamma kommuni akornanni naligiissaarineq pillugu massakkut aamma paasinarsivoq Naalakkersuisut akornanni aamma ataatsimoortoqanngitsoq, Sara Olsvig oqarpoq.

AAMMA ATUARUK Aleqa illuatungiliuttunut: Innuttaasuni amerlanerussuteqartut kissaataat ataqqineqartariaqarpoq

Partii Inuit siulittaasuat Nikku Olsen assingusumik aamma oqaaseqarpoq:

- Aningaasanut inatsisissaq pillugu assigiinngitsunik isummersortoqarpoq, ilaatigut Naalakkersuisoqataasut akornanni aammalu Inatsisartuni tunuliaqutaasut ersarilluinnartumik akuersiniaratik nalunaareerput. Taamaammat tamakkiisumik tunuliaqutaqartoqanngilaq, Partii Inuit siulittaasuat Nikku Olsen KNR-imut oqarpoq.

Aappaagumut aningaasanut inatsisissatut siunnersuut taama isikkoqartillugu tapersersorsinnaanagu, Siumup politikkikkut oqaaseqartartuata Karl-Kristian Krusep oqaatiginikuuaa, Aleqa Hammondillu tamanna ajoriffissaqartinngilaa:

- Partiitta iluani isorinnissuseqarsinnaanissatsinnut inissaqarpugut. Assigiinngitsunik isummersorsinnaavugut. Tamat oqartussaaqataanerannik tamanna nersuiniarneruvoq, Aleqa Hammond oqarpoq, nangillunilu:

- Aningaasanut inatsisissatut siunnersuut siunnersuutaavoq oqallisigineqarlunilu isumaqatiginninniutigineqartussaq. Isummat assigiinngissinnaapput, aamma partiitta iluani, tamanna pissusissamisuuginnarpoq, Naalakkersuisut siulittaasuat Aleqa Hammond oqarpoq.