Olmert ajugaavoq
Israelimi inatsisartunut ippassaq qinersinermi partii pilerserlaaq Kadima ajugaarujussuassangatinneqaraluaq, ajugaavoq. Partiip siuttua Ehud Ohlmert Israelip kimmut killeqarfia titarniarlugu partiit qinigaasut minnerit suleqatigisinnaasamisut isigisani isumaqatiginialeruttorpai. Ajornaatsuinnaanavianngilarli, juutimmi nunaminertani tiguakkani nunasisimasut nuutsinneqarnissaminnut akerlioqaat.
Qinersinerup unnukkuanili parteertaap Kadimap siuttuata Ehud Ohlmertip palæstinamiut nunaanni tiguakkaminni nunaqqatitik nunasiortorsimasut peersinnissaannik pilersaarutini saqqummiutereerpai.
1967imi 1973imilu sorsunnerni nunaminertat palæstinamiunit najugaqarfigineqartut, inuttaalu pinngitsaalillugit naggorlunnerpaanut inissiisimanertik iluarsiniarlugulusooq Ehud Ohlmert Israelip siunissami ataavartumik kimmut killeqarfigiligassaa suliniutigilerpaa.
Oqalugiarnermini tunuliaqutigaa partiip Kadimap pilersitsisuata Ariel Sharonip assinga, neriorsuutigalugulu Palæstinamiunik isumaqatigiinniarnissaq – pisariaqalissappalli nammineq aalajangiisuuniarluni. Suliassaa siulleq tassaavoq U.S.Ap Kangiani Qiterlermi eqqissineqarnissaanik suliniutigigalua iluatsinneqanngitsoq maanna atorsinnaajunnaartoq paasisitsiniutigissallugu.
Israelimi naalakkersuisut siuttorilerumaagaata Ehud Ohlmertip nunat tamat oqartussaasui siunertarisamanik tatiginnilerseqqaartariaqarpai, minnerunngitsumillu nunaqqatini nunanit tiguakkaminnit peersinniakkani akioqqaartussaassavai, taakkumi ullumimut suli upperimmassuk Guutip imminerminnut nunassarititarigaa.
