Olivinisiorfiup siunissaa isumaliutigineqarpoq

Aatsitassarsioqatigiiffiup Minelcop, Maniitsup eqqaani olivinisiorfimmik ingerlatsisup, aningaasatigut isertitai naatsorsuutigisamit ikinnerummata aatsitassarsiorfiup siunissaa isumaliutigineqarpoq.
februaarip 09-at 2010 08:31

Olivinimik Europamut assartuinermi ingerlatsinermut aningaasartuutit ilaatigut qaffassinerujussui artukkiisut, naalakkersuisut ilisimatitsissutigaat.

Olivinimik pisisartoq pingaarneq tassaavoq aatsitassarsioqatigiiffiup immikkoortortaa, LKAB, Luossavaara-Kiirunavaara Aktiebolag, svenskit naalagaaffiannit pigineqartoq.

- Oqartussaasut Minelco A/S-ilu aatsitassarsiorfiup siunissaa pillugu maannakkut qanimut oqaloqatigiipput. Aatsitassarsiorfik matuneqarallassagaluarpat siunissami tunisassioqqilernissamut tunngavissaqartoqarsinnaassanersoq maanna misissorneqartoq, naalakkersuisut ilisimatitsipput.

Matusinermi pilersaarutip piviusunngortinneqarnissaanut aningaasatigut qularnaveeqqusiisoqarsimavoq.

Seqimi olivinisiorfik 2005-imiit 2009-mut olivinimik 1.700.000 tonsip missaanik tunisassiorpoq. Aatsitassarsiorfik 28-t missaannik sulisoqarpoq.