Olivinimik piianeq maajimi aallartisarneqalissaaq

Atammiup kujatinnguani kangerlummi Niaqunngunami aatsitassamik olivinimik piiaanissamut atortussanik maajip qaammataani piareersalereernissaq, tunisassiornissamullu misileraanissaq aallartinneqariisasoq oqaatigineqarpoq, tamannalu iluatsilluassangatinneqarpoq.

Olivin piiarneqartussaq pitsaassutsimigut pitsassuusasoq naatsorsuutigineqarpoq.

Taamaammat Atammiup eqqaani Niaqunngunami savimminiliornermi akuliunneqartartumik olivinimik piiaanissaq tunisassiulernissarlu pilersaarutiminnut pissanganarnerpaanut ilaasoq, aatsitassarsiornissami piginneqataasussani oqaasissaqarnerpaajusuni svenskit suliffeqarfiutaanni Minelco AB-mi qullersaq Per-Erik Lindvall oqarpoq.

Aatsitassamik piiaanissami tunisassiornissamilu Minelco AB piginneqataassutit 51 %-iannik piginneqataasussaavoq.

Europamilu nunat akornanni olivinimik tunisassiorneq unammillerfiusorujussuusoq aamma oqaatigineqarpoq.

Nunatsinnilu piiarneqartussap pitsaassusaa pitsassuusasoq ilimagineqarmat, tunisassiornissaq iluatsittumik ingerlassasoq ilimagalugu, piginneqataasussani qullersaq Per-Erik Lindvall aamma oqarpoq.

Nunarsuaq tamakkerlugu olivin-ip tunisassiarineqartarnerani ukiumut 4 millioni tons piiarneqartartoq oqaatigineqarpoq, Niaqunngunamilu ukiumut 1,1 millioni tonsip piiarneqartarnissaa naatsorsuutigineqarmat tamanna nunarsuaq tamakkerlugu tunisassiarineqartartup sisamararterutigissagaa oqaatigineqarsinnaavoq.

Piareersarnermi misiligummillu tujnisassiornermi aallaqqaammut inuit 35-niit 40-it tungaanut amerlassusillit sulisorineqarnissaat naatsorsuuutigineqarpoq. Aapaagu 50 %-imiit 70 %-ip tungaanut tunisassiorsinnaanissaq naatsorsuutigineqarpoq, ukiullu marluk qaangiuppata suliffeqarfik ingerlallualivissasoq, tassa tamakkiisumik tunisassiulissasoq naatsorsuutigineqarluni.

Europami nunat olivinimik nioqquteqarfigineqassapput, oqaatigineqarporlu USA nammineerluni savimiliornermut akuliunneqartartunik allaanerusunik nammineq isumagisuusoq, siunissamilu olivinimik niuerfigineqalersinnaanera naatsorsuutigineqarsinnaasoq oqaatigineqarpoq.