Olivin-isiorfimmi Atammimmioqarpianngilaq
Atammiup eqqaani Seqinnersuusami olivinimik piiaaneq ukiup affaata matuma siorna aallartippoq. Sullivimmilu tassani inuit 50-t missaat atorfissaqartinneqartut akornanni Atammimmeersoq ataasiinnaq kisimi sulisuuvoq, sinneri danskiullutillu Maniitsumeersuupput.
Olivinimik piiaaneq Seqinnersuusami Atammiup kangerluata iluani Niaqunngunami ingerlanneqarpoq. Sullivik taanna ukiup affaata matuma siorna aallartimmat neriuutigineqarsimagaluarpoq Atammimmiut arlaqartut suliffigiumaaraat, maannali Atammimmiu ataaseq kisimi Atammimmeersutut sulivoq. Sinneri Maniitsormiuunngikkunik qallunaajupput.
- Arlaqarnerulaarsinnaasutut tallimat qulit missaaniluunniit naatsorsuutiginikuugaluarparput, sulifferujussuanngortussatut naatsorsuutigineqarmat. Malugisinnaasatsitullu suli tappinnga alliartorpoq, illuliortiterput, kisianni tassa maanngaanniit ataasiinnaq kisimi sulivoq, taama oqarpoq, Atammimmi nunarfiup aqutsisuini siulittaasoq Jonas Poulsen.
Olivinisiorfik ammaqqaarmat Atammimmeersut inuit sisamat sulisimagaluarput. Taakani sulisimagaluartoq Hans Poulsen oqaluttuarpoq soraartariaqarsimalluni danskimik ittoqarnertik pissutigalugu danskisut oqalussinnaannginnamik immikkoortitaallutik misigisarsimallutik, ilaatigut allaniit akissarsiakinnerullutik aammalu ullormut aalajangersimasumik sulisinneqartarsimannginnamik, illuatungaani danskisut oqalussinnaasut aalajangersimasumik sulisinneqarnerusartut. Taassumali erseqqissaatigaa, ittorisimasartik taanna maanna soraareersimasoq tusarsimagini.
Nunaqarfiup aqutsisuini siulittaasoq Jonas Poulsen oqarpoq, Atammimmiumik ataasiinnarmik sulisoqarneq pillugu iliuuseqaraluarlutik.
- Maniitsumut oqariartuutigisarparput uagut akuutitaanerunissarput kissaatigalugu, Jonas Poulsen oqarpoq. Oqaluttuarporlu Maniitsormiut olivinisiorfimmut suliartoqqullugit kimigiiserfigineqartarsimanerat tusartaritsik, illuatungaani Atammimmiunut kimigiisertoqassanani.
Maniitsumi borgmesteri Søren Lyberth oqarpoq, tamanna iluamik ilisimasaqarfiginngikkini aammalu akulerunnissi mianersuutigissagini. Neriorsuivorli tamakkuninnga equngasoqarsimassappat aqutsisunut tamanna apuukkumaarini unitsinniarsarissaginilu.
