Olivin-imik piiaanissaq Maniitsumut iluaqutaassaaq

-Maniitsup Kommunianut pingaaruteqartupilorujussuussaaq! Atammiup kangerluani Niaqunngunami olivin-imik piiaasoqalernera pillugu taama oqarpoq Maniitsumi borgmesteri Søren Lyberth.

Piiaasoqalernerata kingunerissavaa illoqarfimmi suliffissaaleqinerup qaffakkiartuinnartup unitsinneqarnera. Suliffissaaleqisut ullumikkut 11 procentiupput, tassa 229-it suliffeqanngimmata.

Kinguppannik tunisassiorfiup 2001-mi matunerata kingorna suliffissaaleqineq qaffappoq. Borgmesterillu neriuutigaa, tamanna qaangerneqalersoq.

Olivin-imik piiaasussat, svenskit aatsitassanik suliffeqarfiutaat Minelco-p, nunaqavissut 40-it missaaniittut sulinissamut pisariaqartippai, taakkuli paarlakaajaallutik sulisussaammata sulisut amerlanerulaarsinnaasut, borgmesteri oqarpoq.

Maniitsup kommuniata Maniitsumi aatsitassanik piiaasussanik ilinniarfimmik pilersitsiniarluni periarfissanik misissuileruttorpoq. Søren Lyberth ilisimatitsivoq Naalakkersuisut siulittaasuata Hans Enoksen-ip ippassaq ataatsimeeqatiginerani paasinartoq, Namminersornerullutik Oqartussat isummamut soqutiginnittut.

Søren Lyberth-ip neriuutigaa KANUKOKA-p SIK-llu ilinniarfissaq nutaaq aningaasatigut tapersersorumaaraat.