Olivin 42.000 ton Nunatsinniit Amsterdamiliaanneqarput

Nunatta oqaluttuarisaanerani immikkoorluinnartumik ullumikkut pisoqarpoq, tassa siullermeersumik umiarsuarsuaq 42.000 ton olivinimik useqarluni Maniitsup kujataanit Seqinnersuusamit Amsterdam-iliarluni aallarmat.

Pilersaarutit eqquutissappata olivinimik aatsitassarsiorneq ukiuni 100-ni tulliuttuni nunatsinni suliffissaqartitsiinnarani aamma aningaasatigut isertitsissutaassaaq:

Maniitsumi borgmesteri Søren Lyberth oqarpoq, olivinimik aatsitaassarsiortoqalernera nunatsinnut annertuumik sunniuteqassasoq:

- Annertoorujussaurmik sunniuteqartussaavoq aamma sunniuteqalereerpoq. Maannakkorpiaq inuit 48-it, taakunaannga 21 Maniitsumut akileraartut sulisorineqarput, taakkulu Maniitsumut akileaarnermikkut aningaasaqarniarnikkut iluaqutigilereerpavut, Søren Lyberth oqarpoq.

Søren Lybert oqarpoq aappagu naatsorsuutigineqartoq inuit 100-it miisingi aatsitassarsiorfimmi ulloq unnuarlu sulisoqartalerpat sulisorineqarsinnaaneri naatsorsuutigineqartoq.

Svenskit piginneqatigiiffissuat Minelco AB ukiuni 30 - ini Olivinimik piiaanissamut akuersissuteqerpoq.

Søren Lybeth nassuiaavoq, Minelco AB aggustusimi aatsitassarsiorlutik aallartittut, kingusinnerusukkut nunatta karsianut akileraaruteqartalerpata nunatta aningaasaqarneranut olivinisiorneq iluaqutaassasoq:

- Aatsitassarsioqatigiiffik aallartisarnermini angingaasartuuterpassuaqarpoq, kisianni ukiuni qaninnerusuni selskabsskat-imik nunatta karsianut akiliisalernermigut aningaasatigut isertitsissutaasalissapput, Søren Lyberth oqarpoq.

Aatsitassanut Ikummatissanullu Pisortaqarfimmi ujarassiooq Marianne Jakobsen oqarpoq, naatsorsuutigineqanngitsoq Seqinnersuusami aatsitassarsiorneq annertuumik mingutsitinissaa, tassami olivinimik piianeq ujaqqanik piiaavittuulli mingutsitsitinani piiaavittaani putorsuarmik pilersitsiinnartarmat.