Olga P.: Isorliunerusunut pilersuineq naammaginanngilaq
Suliffeqarfiit allat isumaqatigiissuteqarfigineqarsinnaanerat, aningaasanut inatsimmi periarfissaasoq Inatsisartuni ilaasortaq allappoq. Periarfissaq tamanna atorneqarsimanersoq, imaluunniit misissorneqarsimanersoq , Olga P. Berthelsenip apeqqutigaa.
Nunaqarfinni isorliunerusunilu nioqqutissanik pilersuinerup naammaginannginnera Radioaviisimi piffissami kingullermi sammineqarpoq, soorlu Kullorsuarmi nioqqutissanik amigaateqarneq sammineqarluni, tamatumalu kingorna naalakkersuinermik suliaqartut piumasaqarput, Naalakkersuisut iliuuseqartariaqartut, nioqqutissallu innuttaasunit pinngitsoorneqarsinnaanngitsut isumagineqarnissaannik piumasaqartoqarluni.
Inatsisartuni ilaasortaq Olga P. Berthelsen paragraf 37 najoqqutaralugu naalakkersuisunut arlalinnik apeqquteqarpoq, apeqqutigisaanut ilaalluni, Namminersorlutik Oqartussat KNI-mik kiffartuussinissamik isumaqatigiissuteqarnerat naammaginartumik naammassineqarsimanersoq.
Suliffeqarfiit allat isumaqatigiissuteqarfigineqarsinnaanerat, aningaasanut inatsit tunngavigalugu 100 millionit koruuninik immikkoortitsiffigineqartoq atorneqarsimanersoq, imaluunniit misissorneqarsimanersoq, Olga P. Berthelsenip Naalakkersuisunut apeqqutigaa.
- Aningaasat amerlapput taamaakkaluartoq, maannamut ukiorpassuanngortuni, nunaqarfinnut isorliunerusunullu pilersuinerput ajornartorsiutinik naammattoorsiffiujuarpoq, Olga P. Berthelsen Naalakkersuisunut apeqquteqaammini ilaatigut tamakkua tunngavilersuutigai.
